Мир - вашему дому, покой - вашей душе!
ЛЕЗГИ МИСАЛАР - ЗАРАФАТДАЛДИ
А ваз акур валара къуьр амач, ам маса валариз фенва.
Авачир гьич къуьрен карчни авач, са къуьрелай вичелай гъейри.
Авачир чан азраилдизни жагъидач, иллаки сура чуьнуьх хьанваз хьайитIа.
Агъдин са кьил лацу, са кьил чlулав жедач, сада вичин кIвачер михьнавачиз хьайитIа.
Адав кIекеризни ван тахьай хабарар гва, чебни вири верчерикай я.
«Ада зав кака хаз тазва», - арза авуна вечре кIекрелай дуванбегдиз.
Адаз кьванбур лагьанайтIа, Самур вацIни винелди хъфин мумкин тир. Гьелбетда, ахцегьвийривай ихтияр къачуна.
Адай акъат тавурди са кьелни нафт я, акъатай шейэрикай виридакай чун рахадач.
Адан кIане гъери авайди туш. - Бегьем аш туш ман.
Дуст куьгьнеди хъсан я, чехир – КIварчагърин.
Ажал агакьай кьифрез кацивай рухсат кIан хьана: нотариус кицIизни эверна, веси кхьидайвал.
Азраилди чан къачуда, фекьиди дуьа кIелда. Сифтегьанда – гьавайда, муькуьда – гьакъидихъ.
Акурдаз акуна, такурдаз – ахквада, ахпа чун рахада.
Акъвазнавай цихъайни ял яда, спиртдиз затIни жедач.
Акьул бармакда ваъ, кьиле жеда; бес кьил вич мад бармакда жезвачни?
Акьул - кьиливай, берекат – чиливай, къизилар – гъуьлуьвай.
Акьуллу бахтунин, девлетлу тахтунин гьерекьатда жеда, амма садазни жагъидач.
Акьул пулунихъ маса къачуз жедай затl туш, маса гуз – жеда.
Акьулсуз кьил кьезил жеда, вине кьазни регьят я, гарданни какурдач.
Аламаз ички хъвайиди кьведра пиян жеда, хумар (пахмел) - садрани, хумар туьквенчи жеда.
Аллагьди вичиз такIанбуруз акьул гузва, кIанибуруз – къуллугъарни пулар.
Аллагь цаварал – пачагь чилерал – Фридман Фуьруьгъдал.
АскIандал гьалтна – кам ягъ, кьакьандал гьалтна – агъуз хьухь, делидал гьалтна – кат.
АтIласни хун са къиметдай жедач, художникарни кьейибур гзаф авачтIа.
Ахмакь алачир мехъер жедач, фекьи алачир - йикьер.
Ахъагъай хьел кьулухъ элкъведач: бумеранг туш кьван.
Аш акурла агатиз, лаш акурла катиз, руш акурла – манияр лугьуз.
Ашнадин ашарал кIукI жеда, ярдин гъиле кавчатIур авайла.
Аялар гзаф авай кIвале шейтIандиз чка амукьдач, бязи вахтара жувазни.
Аял галай пабни кьий, кицI галай мугьманни кьий, пенсия авачир ирандидени.
Аял - кьепІинамаз, дана – епинамаз, эрекь – экуьнамаз.
Аял ракъурна, гуьгъуьниз чукура, тахьайтIа птулка хада.
Аялри гъвечIи чIавуз ахвар атIуда, чIехи хьайила – кьарай, кьейила – сур.
Багъдин буба багъманчи я, диде – базар.
Багъманчидин вил емишрал жеда, заргардин вил – гимишрал, сикIрен вил – гьуьндуьшрал.
Багъишай балкIандин сарариз килигдач, абуруз къизилдин сарар ядай адет туш кьван.
Багьа хъицIикьдикай бармак цваналди, акьуллу жедач, кесиб хьун мумкин я.
БалкIан наибдинди хъсан жеда, руш – кесибдинди, пIапIрус – чараданди.
БалкIандиз леэнар ягъиз акурла, ламра вичин кIвачни кхьеналдай, япар кIевна.
БалкIандин кьенерар жезмай кьван гъуьргъуьз яхъ, аялдин – кIевиз, папан – чIугуна.
Бармак алукIналди никай хьайитIани итим жедач, ктаб акъудналди никай хьайитIани – шаир.
Бегьем папа ламракайни итим ийида, вичиз лам хьиз муьтIуьгъ итим.
Буба рекьидай чIал чидайтIа, шаламрихъ дегишардай: кIвачеризни къулай жедай, кучуддай харжарни жувай акъатдачир.
Ваз уьмуьр кьван заз ахварар акунва, чебни рангунинбур.
ВакIаз кьар жагъида, ламраз пар жагъида, айгъурдиз – хвар.
Вахтуни вири хирер сагъарда: вичи ийизвайбур я кьван.
Вахтуни къумадикай къван ийида, къванцикай – къум.
Вацраз инсанар вири угърияр хьиз я, ракъинивай экв чуьнуьхзавай гьа вич хьтин.
Вири - виниз–виниз, Али - гурарин кIаниз, Сажидин Саидгьасанов – Кьасумхуьрел.
Гатун тавур дуьгуьдикай аш жедач, атIун тавур тIвалуникай – лаш.
Гамунал эцигуй вун, вични чичIедин!
Гаф лагьайданди я, пул – жагъайданди.
Гишин вечрез ахварайни цуькI аквада, къуншидин верчери незвай.
Гум дуьз акъатзавайла, гурмагъ патахъ хьуникай вуч ава, тфенгдин луьле туш кьван.
ГьакI ацукьдалди, кицIериз къван гайитIани хъсан я, белки садахъ галукьин.
Гьарда вичиз юлдаш хкядайла, ламра чувуд хкяна, кьеж квайди я лагьана.
Душманар артух хьана кIанзаватIа, гьар хуьре са дуст яхъ.
Гьахълудаз гъил хьиз гуда – дердерни гъамар.
Гьина гьахъ аватIа, гьана бахтни ава, нагьахърин гуьгъуьнай экъечI тийиз.
Гьуьрмет авуна, гьуьлуьз вегь, гарданда са залан къванни туна.
Дуст кьаз регьят я, хуьз – четин, иллаки кIвалахдик квачирди ятIа.
Жанавур кIвачери хуьзва, стIалвияр – ичери.
Жегьилвал ахмакьвал лагьай чIал ялда. Заз садра мад ахмакь хъхьанайтIа, мад затIни кIандачир.
Жибинда кьиф къекъвезва, вични гишин кьиф.
Жувалай чIехи къванцелни алукь, кьиллихъди ваъ.
Жуванбуруз – мухан фу, папанбуруз – къуьлуьн фу, иситIани алтадна.
Жуван мез жуван душман я, сарарин пару янаватIани, арабир хуьз жезвач.
Жувахъ авачтIа, гуьрчег паб къуншидихъ кьванни хьуй, яргъалай килигиз вилер тухардайвал.
Заpдин къимет заpгаpдиз чида, чехирдин къимет - духанчидиз.
Зарни тIвар теклифайтIа, кьведни къачу.
Ирид кIвализ муьжуьд кавха, чебни вири сесер гана хкянавайбур.
Инсандиз и дуьньяда таквазвайди са вичин сур я, агъа дуьньяда аквадайди - тек са вичин сур.
Итимдиз кьуьлуьнин макьам гьамиша папа язава, вични хкадардай макьам.
Ич ичин тарцик аватда, кIерец пехъре тухун мумкиин я.
ИчIи гъилиз кицIни килигдач, гьаким анихъ амукьрай.
Кал къвалахъай ацада, цІегь – кьулухъай, ахмакь вири патарихъай.
Кап ягъун тIалабайла, дабанда цаз ава лагьана, кьве йис вилик акьахай.
Кар кIеве акIайла, вакIазни буба лагь: паспортдиз килигзавач кьван.
Къван къачун – са айиб, ягъ тавун – кьве айиб, гъил зурзана ам жуван кIвачел алукьун - айибрин айиб.
Къенин кIвалах пакадал вегьемир, муькуь йикъал вегь.
Къуншидин аялар хъсанбур я: абуру къуншидин кьил тIа ийизва; къуншидин паб мадни хъсан я: ада къизилар къачун къуншидивай тIалабзава.
Къуншидин верч къаз хьиз аквада, кIек - страус хьиз.
Къунши хъсанди хьайила, буьркьуь рушазни гъуьл жегъида: биши, лал ва кьили тIветI ядайди.
Къуьл авачир кIвале кьиферни жедач, эрекь авачир межлисда – кеферни.
Къуьлуьн фаз ракьун руфун герек я, силин фаз – гьулдандин.
Къуьр вилер ахъаз ксуда, ченги – кIвачер ахъаз.
Кьел тIуьрда ядни хъвада, эрекь хъвайиди хумарни жеда.
КьецIида звердайла, буьркьуьдаз акуна, судьядини адан гафарал къул чIугуна.
Кьил алачир къабни кьий, гъуьл авачир пабни кьий, кIизри галачир пивони.
КIанибур къад жеда, кьисмет – сад, гьадани, зилиди хьиз, уьмуьрлух ви иви хъвада.
КIараб квачир як жедач, мецелай гъейри.
КIарабрини ватандихъ ялда, ишикIда аваз.
КIарасар гудзавай якIун тум кIарасдинди я: хаинвал я, РФ УК-дин 275 лагьай статья къвезва.
КIатIак киле кутада, бочкадик – балун.
КIаш ятIа – ягъна кIанда, кIавузар ятIа эхна кIанда, цIай ятIа ифирна кIанда, яд ятIа – къурна кIанда, цазвайди ятIа – ацIурна.
КIвал авур каца кIвалин цлахъ жеда, хандакIдиз цвар ягъай кац – кIвале.
КIвале - кIек, хуьре - верч, шегьерда - цицIиб.
КIвалин гьалдикай калин гьалди лугьузва, кьулухъ кьатIариз къеркъет янавай.
КIвачин кIан ква хьайила, рехъ акъатда, кьилин кIукI ква хьайила, цIийи бармак къачуда.
Ламра къудухдиз ирс яз арабани тада, вичин тIварни.
Ламран женнет руьхъверай ацIанва, кицIин женнет – кIарабрай.
Ламран садакьа жанавурди гуда, ламран вичин якIалди.
Лацу къавахдин хъенни чIулавди жеда, лацу цIегьрени чIулав цIимилар ийида.
Лашуни севрезни кьуьл ийиз чирда, кIани макьамдал.
Лекь къарагъай чкадал цIакул алумукьда, гьаким къарагъай чкадал - эрекь амай шуьше.
Макьамни вичи язава, кьуьлни вичи ийизва - шабаш гудай кас авач.
Мал зиди – уьлже кьасабчидинди.
Мекьи кьуьдни кьий, кьуьзуь гъуьлни кьий, гатуз къурухчидикай ашна кьадайвал.
Мехъер жуванди жен, мевлид – къуншидин, садакьа – душмандин.
Мецин дувулар далуда ава, кIвенкIв авай чка гьеле алимриз жагъанвач.
Миресар мал пайдайла чир жеда, халуяр - хала кьейила.
МискIинда фекьи гьахъ я, регъве – регъуьхбан, Китайда - Мао Цзедун.
Нехир хуьруьгринди хвена, гьахъ хъуьлуьдривай къачуна, чехир ахцегьрихъ галаз хъвана.
Пакадин вечрелай къенин кака артух я, лахъуди туштIа.
Папакай хъелай чувуд къванцел ацукьда, лезги – куьчедай физвайбуруз арза ийиз - варцел.
Пулуни мукьва-кьилияр хада, табасаран папари хьиз, йисан кьиле сад.
Рапунин хъуькъуьндай девейрин карванар тухудай жуьре я, чебни парцик квайбур.
Рекьимир, цIегь, гатфар къведа, майдин чIехи сувар жеда, шишер ядай цIай хъийида…
Рехъ атIуз, дагъ атIуз, ламран тумуни хандакI атIуз, къведа ХункIар пачагь Газардин КIамуз…
Рехъ фейибурунди я, дуьнья кIанибурунди я, пенсия - кьуьзуьбурунди.
РикIе – сад, мецел – масад, куьрелди, фасад.
Руш гана - лам къачуна, са кIеретI аялар авай арабадик кутIунна, ишлемишиз гатIунна.
Секин цивайни секин кицIивайни, секин итимдивай Аллагьди вичи яргъазрай!
Сивиз тухузвай афар жакьвана неъ, сивяй акъудзавай гафар жакьвана акъуд.
Са гъилеллай тупIарни сад туш: садбурухъ тупIалар гала, муькуьбурухъ галач.
Са гъилив кьветIелдин тIвални ахъагъиз жедач…рюмка хкажиз жеда.
Сад ава кIанивал, сад ава жеривал, садни ава кака хаз тун.
Садбуру куьнуь язава, масабуру – къеле, Играма – виш граммар.
Сарар суруз тухвана, пуд къизилдинбурни квай.
Са тфенгдай кьве къуьр яна: аквадай гьаларай, патрумдал картечарни алай, къуьрерни пабни итим тир.
Свас къаридин дабандавай цаз я, къари сусан – гьамиша тIазвай свах.
СикIрен вири махар верчерикай я, чебни вири гьа са жуьреда куьтягь жезва.
Хъипрез вич авай вирелай багьа затI авач, шарчиз - вич квай хъурталай.
ЦIил яргъиди хъсан я, ихтилат – куьруьди, паб – тIимил рахадайди.
Чарадан къулавай цIу чарадаз чими ийида.
Чип вегьейла, кесибдиз тIур, фекьидиз кур акъатна; хуьрек садавайни нез хьанач: фекьидиз тIур жагъанач, кесибдиз - кур.
Чубандиз кIан хьайитIа кьунакайни ниси хкудда, иесидиз кIан хьайитIа, чубандикай вичикайни.
ЧIагъ ирид церай чуьхвейтIани лацу жедач, ранг ягъун герек я.
ЧIал кьурдахъ лугьудай гафар пара жеда, амма лугьуз жедач.
