Мир - вашему дому, покой - вашей душе!


АФОРИЗМАЯР

 

Чилин шардихъ шал гала

*****

Тек асади, вич патахъди ятIани,
Дуьз хъийизва патахъбур

*****

Санани садрани гужлубур
Хьайид туш садазни буржлубур

*****

Вуна заз вич патал чанни гуз гьайиф тушир затI багъиша, за ваз дуьньядал виридалай гуьрчег кьиникь багъишда

*****

Гатфарикай виридалай таъсирлу шиир зулу кхьизва

*****

Зи вири суварар зун и дуьньядал атай юкъуз куьтягь хьана

*****

Низ хьайитIани ачухиз, зи рикI ашер папан дакIар туш

*****

Бахтунин тахтунал анжах вахтуналди ацукьиз жеда

*****

Пачагьдин мукьвадини, вахт атайла, Аллагьдиз мукьва жеда

*****

(этюд)

Кьуьд...
Сурухъ галай вили къван,
Налугьуди вили хьанва мекьила…

*****

Низ кIанзава – ам зурба я,
Вуж кIанзава – ам тек туш

*****

Эрекь ширин хьайидан кьисмет туькьуьлди жеда

*****

Бахтунив ви адрес гвачир хьтинди я, Майрудин…

****

ГъвечIи гагьда жезвай чIехи кIвалах анжах сад я – кьиникь

*****

Хъсан фикирарни, чинебан ашнаяр хьиз, йифериз къведа

*****

Политикадиз вири захутIрай физвай хьтинди я – виридахъай ни къвезва

*****

Бахтни ахвар хьиз я – гъвечIи чIавуз чIехи жеда, чIехи чIавуз – гъвечIи

*****

Зи ктабринни аярин арада авай тафават анжах сад я – аялриз тIварар за дуьньядиз атайдалай кьулухъ гана, ктабриз – дуьньядиз къведалди

*****

Чун вири къекъверагар я – чун вири бахтунихъ къекъвезва

*****

Гьар са кицIиз гьар са шалман вичиз цвар ягъиз акIурнавайди хьиз я

*****

Мумкинвални, кьуьзуь хьана рекьидай,
Аламат я, кьиле ацахь тийидай:
Тек са рекьяй къвезва чун и дуьньядиз,
Агъзур рекьер ава инай хъфидай.

*****

Гъилер азад хьайила, чун инсанриз элкъвена, руьгь азад хьайила, чун аллагьриз элкъведа

*****

Дишегьлиярни цуьквер сад хьиз гуьзелзава. Амма цуьквер дишегьлийрилай хъсан я – абур рахадач

*****

Тахтунал ацукьун хъалчахриз къулай я, кьилиз – хаталу

*****

Кимелай, кьуьзуьбур атайла, жегьилар хъфида, уьмуьрдай, жегьилар атайла, - кьуьзуьбур

*****

Лезги литературадин паруяр ацахьнавай хьтинди я – ана гзаф данаяр аваз аквада…

*****

Виридалай гуьрчег шикил: сирендин цуьк – тарал, виридалай эйбежер шикил: сирендин цуьк – гъиле

*****

ЦIайлапандикай дуст кьурди сифте цIу куда, ахпа марфади кьежирда; дишегьлидикай дуст кьурди сифте накъвари кьежирда, ахпа дердери куда

*****

Дуьньядихъ кьве жуьре халис душманар ава: гъуьлуьз тухун тавур папарни машгьур тахьай шаирар

*****

Са дишегьлиди чун хазва, маса дишегьлиди – рекьизва

*****

ТIалсуз уьмуьрдиз къвез жезвач, тIалсуз – хъфизни. Амма виридалай чIехи тIал … уьмуьр вич я

*****

Чун садра хазва, садра яшамиш жезва, садра рекьизва. Амай вири кIвалахриз тикрар хьун хас я

*****

Чехирдихъни уьмуьрдихъ са уртахвал ава – чаз абур кьенятиз чизвач

*****

Шииррални, муьгьуьббатдал хьиз, хелветдиз машхул хьана кIанда

*****

Акьул пулунихъ къачуз жедач. Акьуллуяр – жеда.

*****

Москвадиз, гъалибвилин парадда иштаракиз, кьве агъзур ветеранни са агъзур аса атанва.

*****

Такабурлувал квадаррай шаир яд фейи ракь хьиз я – акатайда патахъарда

*****

Къадагъалу ич тIуьрдалай кьулухъ Гьавадин рушвал квахьна, дуьньядин - кьарай

*****

2000 – йисан мартдиз Путинакай Урусатдин пачагь хьана, закай – гатфарин лукI

*****

Эвел регъуьвал квахьда, ахпа шалвар

*****

Къвез-къвез дишегьлийрин перемар куьруь жезва, мецер – яргъи

*****

Пул гьамиша ам авачирбуру негьзава

*****

Сифте за эрекь авай птулкадин кьил алудна, ахпа эрекь авай птулкади – зи кьил

*****

Яргъалди анжах яхун гьерер амукьда

*****

Ахмакьвилиз тфу гумир – ахмакьвал гзафбуру яд хъвазвай булах я

*****

Чинардинни анардин тарари гьуьжетналди, я анардин тар кьакьан жедач, я чинардин тарци анарар гъидач.

*****

Са карда чун верчериз ухшар я: верчериз чпи экъягъай цицIибри са кIуьд вацралай кIеквал ийизва, чаз – чна хкягъай гьакимри…

*****

Дишегьлияр чи кьвед лагьай пай ятIа, ам чи хъсан пай я

*****

Дишегьлийрик нукьсанар гзаф ква, амма абурун лайихлувилерин кьадар мадни артух я

*****

ЦIай чилел жеда, гум – цава

*****

Дуьньяда кIанивал амай кьван такIанвални амукьда.
КIанивал даим я

*****

Са гъвечIи шиир туькIуьрайла, заз икьван шад жезвай, и гуьзел дуьнья туькIуьрайдаз яраб гьикьван шад хьанатIа? Нагагь Аллагь авачтIа, дуьньяда виридалай зурба шадвални авач…

*****

Яшар пулунилай са карда тафаватлу я: пул гьикьван гзаф хьайитIа, гьакьван чаз шад жезва, яшар гьикьван гзаф хьайитIа, гьакьван – пашман

*****

Бармакри чеб алукIдай кьилер чпи хкядайтIа, белки зазни абур са шумуд жедай

*****

Вирибуруз кагьул кас яз чида зун,
Лянет гузва зи уьмуьрдин еришдиз.
Эй, ахмакьар, тади кваз куьз фида зун
Азраилдихъ галаз къара гуьруьшдиз…

*****

Вине авай кьил ягъиз тади ийида, агъада авай кьилелай кап алтадиз

*****

Инсанри, чими хьайила, перемар хтIунда, тарари – мекьи хьайила

*****

Дагъвияр Алагьдинни инсанрин арада яшамиш жезва

*****

Америкада билбилар авач

*****

ЧIехи дапIарни гъвечIи куьлегдал ахъайда

*****

Фитнедини, цIай кьур кIарасди хьиз, сифте куда, ахпа чIулаварда

*****

Инсандин виридалай чIехи чирвал вич са мус ятIани рекьидайди чир хьун я

*****

Вац1ариз, кьил дагъда аватIани, гьуьл арандай жагъида

*****

Зун бахтлу хьун патал кIаниди са шартI я – вун бахтсуз тахьун

*****

Дишегьли гагь чуплах бахт я, гагь перемар алай бахтсузвал

*****

Виридалай гуьрчег цуьквер рекьин къерехра жеда, чебни руг алаз

*****

Мугьмандихъай кичIе хьун душмандихъай кичIе хьунилайни агъуз кар я

*****

Сулейман бубадин парталар куьгьнебур тиртIани, фикирар цIийибур тир

*****

Бахтсузвал садра къведа, иридра хъфида

*****

Виляй аватдалди тарай аватунни хъсан я

*****

Бахт вахт авачир мугьман я

*****

Инсандал са тIварни са чин хьана кIанда

*****

Садрани са касдизни икрам ийимир – ада ви агъузнавай кьамал кьацIурун мумкин я

*****

Гьахъни пул хьтин затI я – хирде ийиз жеда

*****

Вири гьакьван дуьз къалурзавай гуьзгуьдинни са пад лацуди ятIа, муькуь пад – чIулавзава

*****

Дишегьлиярни гъетер хьиз я – чна абурухъ дат1ана ялзава, агакьайла - абуру чун кузва

*****

Дишегьлийриз киферни йифер яргъибур кIанда

*****

Садан диде – садра аллагь,
Вадан диде – вадра аллагь…

*****

Къе дишегьлидал хъуьрезвайди пака вичихъ шехьда

*****

Икрам цавуз ийизватIани, пел чиле эцязава

*****

Вуна заз къе вуж бахтлу ятIа къалура, за ваз пака вуж бахтсуз жедатIа къалурда

*****

Эгер ваз жувалай гзаф са кас кьванни кIанзавачт1а, ваз жувни са акьван кIанзавач

*****

Ризкьи галачиз зун яшамиш жедач, поэзия галачиз заз яшамиш жез кIанзавач

*****

Ви дишегьли вуж ятIа лагь, за ви эхир гьихьтинди жедатIа лугьуда

*****

Дишегьлидиз гатфар гатфар я лугьуз ваъ, вичин цуьквер алай перемдиз ухшар я лугьуз кIанзава

*****

Дуьнья, итим хьиз, хъуьрезва, дишегьли хьиз, шехьзава

*****

Дишегьли гьамиша хъфизвай бахт я, гьамиша къвезвай бахтсузвал

*****

Ичкидилай кьулухъ кьил са юкъуз тIа жеда, дишегьлидилай кьулухъ – амай вири уьмуьрда

*****

Чна вирида бахтунихъ галтугзава, бахтсузвили – чахъ

*****

Жуван аялар вири инсанриз кIан жеда, чарадан аялар – халис инсанриз

*****

Виридан мурадар цавар я –
Виридан кьисметар накьвар я…

****

Гьич лугьумир: «Мад хъваз жезмач, пиян я»,
Хъивегь жуваз цайиди:
Инсан патал тек са чехир зиян я –
Душман галаз хъвайиди

*****

Шаирвал квасавал туш,
Шаирвал исавал я…

*****

(Эпитафия)

Ам атана дуьньядиз,
Ада дуьнья дегишарнач.
Адан гьунар ам я хьи,
Дегиш хьанач ам вични…

*****

Кефер чIугу, ягъиз югъди тIирипIар,
Вакай садра дишидаз хъел къведалди:
Заз акуна, виш душман хьуй итимар,
Тек са душман шал галайди жедалди

*****

Чи поэзия кимин кIарасдиз ухшар хьанва: акатайда къвез адал вичин яцIу якIар эцигзава

*****

Тариф ичкидилай хъсан затI я – ичкиди хьиз, кьилни элкъуьрзава, пахмелни жезвач

*****

Виридалай залан къван жувал алукьайди я, виридалай залан тIал – жувахъ галукьайди

*****

Намуслу Урусат кьепIерани сурара ава

*****

Инсандин жегьилвални диде кьейи юкъуз рекьизва

*****

Звезды не брезгуют отразиться даже в грязных лужах

*****

ЧIурукIа рахазвайди мез ятIани, гъуд галукьзавайди к1уф я

*****

Чулав сура чун лацу кафандик кваз твазва

*****

Фитнеди чарадан кIвал чIурда, жуван - рикI

*****

Индияда веледри диде-бубаяр кьейила кузва, чина – чан аламаз

*****

Ватан кIан хьун вири кIанивилерин нетижа я

*****

Зи бахтлувал – дуьньядал са дертни жув себеб яз арадал татун я, бахтсузвал – дуьньядал са дердинизни жувавай дава тахьун

*****

Зигьин анжах са карда зиянлу я – гьуьрмет ийидайла

*****

Девлет тIал я, амма ширин тIал

*****

Вири итимар акьуллу папарихъ къекъвезва, вирида гуьрчегбур гъизва…

*****

Инсанни хали сад я – къене патай ктIида

*****

Чигедиз няни садрани аквадач

*****

Кьеб кьисмет хьайидаз сурни кьисмет жеда

*****

Аялрин перемар гзаф кьацIуда, чIехибурун – намус

*****

Инсанарни вацIар хьиз хьанва – анжах агъадалди физва…

*****

Инсан гзаф хъуьрезватIа, инсандиз гзаф писзава…

*****

Ивидин ни галай патахъ алад – ваз инсан жагъида

*****

Бахт хиве кьурдини, бахтсузвал хиве кьурдин Аллагьди дишегьлидин патав ракъурзава

*****

Жува жувахъ галаз тухузвай женгина бронежилетар алукIиз жедач

*****

Урусатдиз къвез жеда – Урусатдай хъфиз жедач

*****

Инсанни хъенч1ин гичин хьиз я: гьикьван гзаф кайитIа, гьакьван лигим жеда

*****

Инсандик гьикьван аялвал куматIа, гьакьван инсанвални кума

*****

КIвачер муркIадилай цIуьдгъуьнда, кьил – тарифдилай

*****

Дустагъда гьат тавуна, тарихда гьатайбурун кьадар лап тIимил я

*****

Уьмуьр аламатдин затI я: 70 йисан къене гьамиша ваз кIандайвал жезва, эхирдай са сеферда – чилик квай шарариз

*****

Шалмандиз вичелай гьи патахъай элясайтIани къайгъу туш

*****

Къе виридалай къачуз регьятбур къенин дарманарни журналистар я

*****

Цаву вичиз икрамзавайбур саймишни ийизвач, чили вичиз икрамзавайбур хуьзва

*****

За анжах са чIавуз жувахъ вилер хьунал пашманвалзава – тIазвай аялар акурла…

*****

За садрани рикIелай ракъурзавач – инсандин мецикни, гъуьлягъдик хьиз, кIарабар квач

*****

Инсанар, чпин кьилин кеспийрилай алава яз, вири хъсан пожарникарни я: абуру кузвай рикIер гьасятда туьхуьрда…

*****

Вири жаллатIриз куьз ятIани бубуяр гзаф кIанда…

*****

Инсанарни цифраяр хьиз я: абурун чIехивал-гъвечIивал кьулухъ галай нулрин кьадардилай аслу я

*****

Зун азад я, куьз лагьайтIа гзафбурулай аслу я

*****

Гьар са кас хун – хатадай я, гьар са кас кьин – къанун

*****

Дуьньядал виридалай яргъи мах дин я

*****

Туфлидин кIуф садра ахъа хьанмазди, чна ам гадарзава. Бес инсанар?…

*****

Гьахъвал гагь гуьлягъдин зегьерлу сухва ава, гагь къизилгуьлдин назик пешина…

*****

Этим Эминанни чи арада вуч тафават аватIа, чидани ваз, Шагьабудин? Чна пIапIрусар чIугвазва, Эмина халкьдин дерт чIугунай, дуст…

*****

Вири къизилгуьллер алай валарал цацар ала, амма вири цацар алай валарал къизилгуьллерни алач

*****

-Дагъви дишегьлияр арандинбурулай квелди тафаватлу ятIа, чидани ваз?
-Чида: арандин дишегьлийри аранда лагълагъарзава, дагъви дишегьлийри – дагълара

*****

БалкIан гьалай патахъ фида, инсан – къулай патахъ

*****

Дагъви дишегьлийрихъ кифер амач. Дагъви дишегьлийриз гила кефер хьанва

*****

Чи бубайрин девирда дагъвидин гаф гьулдандилайни кIеви тир, гила, алюминий хьиз, хъуьтуьл хьанва. Шадарзавайди са кар я: гьамни ракь я

*****

Къавкъазда яргъи ихтилатарни куьруь дявеяр жедайди туш

*****

Гьамиша зун дустарихъ галаз физва, садра зун дустари тухуда

*****

Фазу Алиевадин гунг Дагъустанда виридалай кьакьан кукIуш туш

*****

Жуван нефс муьтIуьгъариз хьайидавай дуьньяни муьтIуьгъариз жеда. Амма нефс авачирдан дуьнья квез я кьван?

*****

Хуьруьн фекьи тирдал паклу,
Адан паб туш кIусни шаклу…

*****

Тарар даим кIвачелла,
Налугьуди датIана
Абурун гимн язава…

*****

Дишегьлидикни гьуьлуьн тIул ква - секиндайлани, лепе алайлани хаталу я

*****

Чилин рекьерай фена, гъетерал агакьдач

*****

Дуьньядал виридалай чIехи кук1уш зи намус я: адал гьеле альпинистар акьахнавач

*****

Намусни, перемар хьиз, чуьхуьдай мумкинвал авайтIа, дуьньядал виридалай кьит затI запун жедай

*****

Игитдин кIвач гьамиша уьзенгдал ала, кьил – сурал

*****

Ажузди гьакимрин буба жеда, игит – етимрин

*****

Игитдин тIвар хцел жеда,
Ажуздан тIвар – вичел…

*****

Игитди суруз чIулав чIарарни лацу сарар тухуда

*****

Складчидиз кIвализдалай дустагъдиз мукьвал я

*****

Виридалай важиблу тум турунинди я

*****

Хъел виридаз къведа, гьалализ виридавай жедач

*****

Къунши маса къачуз жедач, маса гуз – жеда

*****

Гатуз чилиз икрам тавурда хъуьтIуьз къуншидиз икрамда

*****

Уьмуьрдайни, хабарсуз гъуьл хтай ашнадин дакIардай хьиз, хъфена кIанда: вири туна ва артух ван-сес тавуна

*****

Ахмакьвал ахмакьдин пачагь я, акьул – акьуллудан лукI

*****

Нагагь чпихъ тIимил кьванни акьул авайтIа, вири дишегьлияр базаррал жедай – ам гуьрчегвилихъ дегишариз

*****

Дишегьлидиз итимдикай кьведра халис хъел къвезва: жегьил чIавуз – вичин цIалцIамвал аквазвач лугьуз, кьуьзуь хьайила – вичин биришар аквазва лугьуз

*****

Инсанри инсанрилай маймунриз гьурметзава – абуру маймунрин як недач

*****

Экуь ракъинизни анжах мичIи гуьзгуьдай килигиз жеда

*****

Ахмакьдикай дуст кьурдаз дердиникай стха жеда

*****

Кьве гьалда авайла вири инсанар хъсанбур я – ксайлани кьейила

*****

Къазанжияр фад къведайбур хъсан я, мугьманар – фад хъфидайбур

1  2

 

На титульную страницу >>>

На главную страницу >>>

 

 

Цитата месяца: "Целые народы ненавидят уроды" М. Бабаханов

 

Сайт управляется системой uCoz