Мир - вашему дому, покой - вашей душе!
ЦЕЗАРАН КЬИНИКЬ
Ргазва Рим – дуьньядин меркез,
Къалин хьанва кушкушрин ванер:
Египетдин ченгидин гинез
Вегьенва Рим, кьаз тапан кьинер…Инсан икьван женни бес дегиш?
Вич аллагьдай гьисабзава къе.
Гьич са касни хъийизмач саймиш,
Паклу тир Рим кьасабзава къе …Пака ганва Сенатдиз эвер,
Гъалаба ква Цезаран рикIик -
Гьар жуьредин атанва ванер
Жедайдакай къалмакъал, чуьруьк.Вуж аватIа бунтчийрин кьиле,
Адаз тайин чир хьанвач гьеле.
Гьардан патав, авуна кIвачин,
Ракъурнава жасусар вичин.Нянихъ санал кIватI хьана кIвале,
Вад касдин тIвар кхьенвай виче,
Брут аваз - хва лагьай - кьиле,
Чар вугана Цезаран гъиле.КIелна, тадиз вад лагьайдан тIвар
ЧIурна ада, чIугуна са цIар:
-А кас жедач и сиягьра таз -
Ам садрани акси жедач заз.Пагь атIана амукьна вири -
Брутан тIвар тушир ам кIани.
Са жегьил тир, гьакIан чалкечир,
Бегьемдаказ садазни течир.-Чаз аквазва аламатдин кар,
ЧIур тавуна Брутанни тIвар,
Вуч сир я вун а касдихъ агъун?
Виридакай гьадал шак тагъун?-Муькуь кьудаз, сиягьда авай,
Зи патай кIус заланвал хьанач.
И вадакай тек гьадаз завай
Садра кьванни хъсанвал хьанач.Дугъриданни, Сенатдал пака
Тун тавурла адак сагъ чка,
Гапурар гвай бунтчийрин юкьва
Авачалдай тIвар чIурай гада...
