Мир - вашему дому, покой - вашей душе!
РУШАР, РУШАР
КIанибурун тариф гьикьван ийида,
Абур чна элкъуьрнава къашариз.
Хьайиди хьуй, и шиир за кхьида
Зун кIан тушир,
Заз кIан тушир рушариз.Заз абурун тIварар вири таниш я,
Мумкин я заз чIехи паяр акунни.
Вуч ятIани герек хьана, саймишна,
Мумкин кар я гзафбур зав рахунни.Абуруз за хиве кьунач гъетер гъун,
ЦIакуларни къизил феникс къушарин.
За гьиссзава, бурж ала зал гьуьлер кьван
Заз кIан тушир,
Зун кIан тушир рушарин.Гьич садазни эвернач за гуьруьщдиз,
Я чеб зални ша лагьана алахънач.
КIанида хьиз, тунач гьакI чеб вилив хуьз,
Куьрелди, зи гуьгьуьлда гьич эцягънач.Абуруз за кагъазарни ракьурнач,
КичI кутазвач абурук зи яшари.
-Ваъ, - лугьуз, зун дакIаррихъай рахкурнач
Заз кIан тушир,
Зун кIан тушир рушари.Буьркьуь туштIа, килиг садра къарагъна,
А вилери ви чан михьиз зегьемда.
Гьи эркекди, рушар, лагь, куьн хкягъна?
КъекъвезватIа зун Аллагьдин гьаремда?Муьгьуьббатдин цIай гьатна, рикI цIранва.
Ксанвай зун, аватна къе ахварай.
КилигайтIа, дуьнья михьиз ацIанва
Зун кIан тушир,
Заз кIанзавай рушарай...
