Мир - вашему дому, покой - вашей душе!
РИКIИН ИНТЕРВЬЮ
1
Зи рикIени авай чIехи мурадар,
Са бязибур акъудна за кьилизни.
Ингье девир дуьшуьш хьанва пара дар,
Уьмуьр кIамач, я кIамач заз рекьизни.
На лугьуди цIунни вацIун юкьвалла,
Инихъ фида - куда, анихъ - дерин я.
Ялгъузни туш, ярар-дустар къвалалла,
Амма зи гьал югъ-къандивай серин я.
Гьисабнач за бахтлу йикъар уьмуьрдин,
РикIелламач бахтсузбурун кьадарни:
Кьисметдивни сир гва сусан дуьгуьрдин,
Гьа са бере ширни ийиз, шадарни.
Виликдай хьиз гьар гьалтайдав рахазмач,
На лугьуди мез кIалхандай атIанва.
Гзафбурухъ зун эсиллагь агъазмач,
Гзафбур заз хаинар яз жагъанва.
Умудсуз яз гьакI яшамиш жедалди,
Умуд амаз кьейитIани хъсан я.
Зун уьмуьрда агъазмайди къедалди
Анжах хайи халкьни хайи ватан я.
Зи хайи халкь! Душмандин гуж акьалтай
Къеле хьиз, зи рикI бинедай чкIанва.
Жеда, жедач - жаваб це заз акьалтIай,
Зун ви патав рикI эхцигиз атанва.
Фад-геж зун вахъ агакьдайдахъ агъанвай.
Зун атай рехъ мичIини тир, четинни.
Кьве виляй заз кьуд виляй кьван аквазвай:
Зав ишигъ гвай Саидан кьве вилинни.
Дарих тирла, галат хьана авайла,
За Эминан чIалар кIелна хуралай,
Къаних тирла, цин стIалдихъ кьурайла,
Чиг хъвана за Чигалидин капалай.
Ви патав рехъ за къванерай атIана
Кацайрал ваъ, тек къелемдин кIвенкIвелди.
Югъ я, йиф я лугьун тийиз дигана
Саяд вахан шелдин хци ванцелди.
Эхи ая, туьгьметун туш-кьагьур я,
За къе вири лугьуда ваз авайвал.
Ахпа, нагагь ваз кIан ятIа, гьазур я,
Къванцин гада жеда закай алайвал.2
Чаз гьардаз жув са аллагь хьиз аквазва,
Рази тежез аллагьдинни гафунал.
Чун кьисметдив, къумарив хьиз, къугъвазва,
Чна вири алцумзава руфунал.
На лугьуди вилерин экв туьхвенва,
Чара жезмач лацувални чIулаввал.
Гьикьван вахт я, гел галачиз хъфенва
Чи рикIерай разивални битаввал.
Килиг садра, яна кьванцин паруяр,
Чуьнуьх хьанва, магъарравай север хьиз,
Вацра садра, кьаз акъажиз хуруяр,
Йикь-шуванда гьатзава чун, кьевер хьиз.
ГалукьайтIа сад къуллугъдин чемберрихъ,
Адан кьилиз, якIв хьиз, арза чуькьвезва.
Куьз ятIани судуйрихъни регьберрихъ
Чун гьамиша гъейри пата къекъвезва.
Чна вири: шадвилерни азабар
Адет хьанва, батмишзава чехирда.
Умудсуз рикI, кьисмет хана-къаябар
Акъвазнава чи гьар садан эхирда.
Вил вегьейла, хуьрериз чи чкIанвай
АкI жезва хьи, Чингисханди канва чун.
Яд чил амач лезгиди чан таганвай,
Ватан аваз куьчери халкь хьанва чун.3
Ам кьисмет я, гьакIан лавгъа къимет туш –
Вал даим са къадагъадин пар ала:
Ваз ажузвал кутугнавай хесет туш, -
Шарвилидин халкь я лагьай тIвар ала.
Ам девлет я, за ийизвай гьуьрмет туш –
Са кардал мад цIайлапандин цIар ала:
Ваз хаинвал кутугнавай хесет туш, -
Къванцин хцин халкь я лагьай тIвар ала.
Имни кьисмет, имни гьуьрмет-къимет туш
Ви зигьиндал, ракъинал хьиз, зар ала:
Ваз буьркьуьвал кутугнавай хесет туш, -
Вал Саидан халкь я лагьай тIвар ала.
