Мир - вашему дому, покой - вашей душе!
РАКЪИНИН СУХТА
Кьил тик кьаз заз чирна хайи дагълари.
Каспийдини - накъварикай гьуьл ийиз.
Вердишарна цIайлапанрин цIаяри
«Лезгинкадал» цIелхем ягъдай кьуьл ийиз.Сефил жедай тIул кутуна хуьрери,
Ватан тирвал инал-анал чкIанвай.
ТIал вуч ятIа, гьиссиз туна хирери,
Багърибуру рикIин къене атIанвай.Хъуьрез чирна дагъдин дели вацIари,
Гьиргьирдин ван тунвай дерин дагьарра,
Муьгьуьббатдин кушкуш ягъиз - нацIари,
Гардан гуьцIиз, туьмердавай шагьвардал.Туьнтдиз рахаз вердишарна къукърумри,
Рагарини – гаф хуьз, кутуг тавунвай.
Гьейран жедай хесет бахшна ханумри,
Гьарма сад са шикил хьтин чIугунвай.Илгьамдин цIай зак ракъини кутуна.
Пай гана заз ада вичин экуьнин.
Вири тарсар за чиливай къачуна,
Тек шиирра – сухта я зун ракъинин!
