Мир - вашему дому, покой - вашей душе!
КЬВЕДАР
*****
Четин кар туш кьуьгъуьрдални ацукьун,
Алажнаваз хьайитIа...*****
Инсандилай инсандин тIвар винева –
Инсан сура, тIвар сураллай къванцева.*****
За гьар са кам хата Чилел вегьезва,
Туп хьиз, кIватIаш, вични даим элкъвезвай.*****
Гъейри халкьар ава чпин дидарда,
Тек лезгияр - базарда...*****
Сарар къвезвай аялдик хьиз,
Къал ква зи рикIик...*****
Кьейидакай хабар авач хайидаз,
Хайидакай хабар авач кьейидаз..*****
ВацIу гузва –
Гьуьлуь даим къачузва.*****
Вуж хана - дишегьлиди тахана,
Вуж кьена - дишегьлиди текьена.*****
Зи пелевай биришра
Самур вацIни агакьда.*****
ТакIанвилин Шалбуз галаз далудихъ,
ЭкьечIна зун кIанивилин Самурдай.*****
Къавах тарар амайбуруз такIан я,
Куьз лагьайтIа кьавах тарар кьакьан я.*****
Зун накь жува вацIун кьере гадаррай
ЗатIарихъ къе гьуьлуьн кьере къекъвезва.*****
Кьведра хана кIандачир заз,
Куьз лагьайтIа кьведра рекьиз кIанзавач.*****
И куьруь тир уьмуьрда
Яргъиди тек кьиникь я.*****
Шегьре рекьел куьрпе руш хьиз,
Ви сивел хъвер къугъвазва...*****
Вахтунилай кьуватлу хьун мумкин туш,
Куьз лагьайтIа вахт садрани секин туш.*****
Кутугнавач итимдиз
Фитени фитне...*****
Мез, куьнуь хьиз, векъи я
Гаф, гапур хьиз, хци я.*****
БалкIан хьиз угъридин кеменда,
Гьатна зун кIанидан теменда...*****
Гьана жеда бегьерлувал,
Гьина авач зегьерлувал..*****
Гъални фида, раб фейивал,
Гъуьлни фида, паб фейивал,*****
Тарцин хилел гьвечIи ич хьиз,
Дигмиш жезва зи кьиникь...*****
ГьвечIи рикIе чIехиди
ТакIанвал я жериди...*****
Гьуьл герек я,
ВацI акъвазрун паталди...*****
Пудра тариф эхай акьул
Ахмакьвилин стха я.*****
Аял чIавуз - чIехибурал пехил яз,
Пехил жезва аялрал чун агьил яз..*****
Кесиб касдин жедалди хан,
Варлудан хьуй сураллай къван.
