Мир - вашему дому, покой - вашей душе!
ЛАЙЛАЙДИЛАЙ ВЕСИДАЛДИ
(КАМАЛДИН ГЕЛЕР)
ЭЙ ИНСАНАР!
Хъсанвилер ая жедай –
Агъмиш ая, эй инсанар!
Тахьурай гьич сад элкъведай,
Къанмиш ая, эй инсанар!
Я эллер, куьн жемир авам,
Къачу вили-виликди кам,
Алуд вагьши душмандин хам,
Бамиш ая, эй инсанар!
Акьулдин гаф жемир залан,
Гъавурда гьат куьн зи чӀалан,
Къаст, азаддай хайи ватан,
Артмиш ая, эй инсанар!
Ашукь Саид ихьтин къул я,
Бегьер гудай майвад кул я,
Няметар дуьньяда буд я,
Дадмиш ая, эй инсанар!
ДУСТ ЖЕДАЙ ТУШ*
Вич ваз течиз на сир вугуз,
Игридакай дуст жедай туш.
Вал хъуьреда, ви мал тухуз,
Угъридикай дуст жедай туш.
Жедач адахъ гьахъвал, инсаф,
Гьикьван ширин лагьайтӀан гаф,
Эхир гатӀум жедай хилаф
Багьридикай дуст жедай туш.
Рахамир вун, тавуна чир
Вуч ятӀа а патандан сир,
Аруш жедай жувал эхир
Гъейридакай дуст жедай туш.
ФИТНЕЧИ*
Чарадалай фитне ийиз,
Вав гьикьван хъурц гва, фитнечи?!
Такунамаз ви кьве вилиз,
Лугьун гьикӀда на, фитнечи?!
Шердин шеле кьуна къуьне,
Къалуриз на чӀуру чешне,
Вун ксузвай кӀвалин къене
Хъуьрезва вал, я фитнечи.
Квадра вуна ви хасият,
Яхъ келледа и насигьат,
Дуьз гафунин яхъ тӀебиат,
Лугьузва ваз за, фитнечи.
ПИС ПАПАЗ
Эй, махлукьат, лугьун за квез агьвалат,
Гуда рикӀиз пис папа гъам-хажалат,
Жедач вичихъ я гьая, я адалат,
А папавай яргъа хьухь куьн, зи дустар.
Зварар гуда рахадайла пӀузариз,
Хине яда лацу хьанвай чӀарариз,
Кар авачиз къал акъудда, гьарайиз,
А папавай яргъа хьухь куьн, зи дустар.
Кьадардилай яргъи жеда адан мез,
Ядай вак хьиз, акъвазда ви вилик къвез,
Гаф лагьайла, рикӀ куда ви вилер шез,
А папавай яргъа хьухь куьн, зи дустар
Нар деве хьиз, акъвазда вун хтайла,
Дели жеда яр-дуст кӀвализ атайла.
Бес вуч ида, чара михьиз атӀайла,
А папавай яргъа хьухь куьн, зи дустар.
Саид, чир хьухь: а паб рикӀиз рекъида,
Кьураз-цӀраз итимни фад рекьида.
Вичин рушни бубад кӀвализ хкида,
А папавай яргъа хьухь куьн, зи дустар.
БЯЗИ ДУСТУНИ*
Даим вичин ачух сифет къалуриз,
Михьи рикӀин хъверда бязи дустуни.
Иланди хьиз, серфе вичиз жагьуриз,
Сагъар тежер херда бязи дустуни.
Кьуьл гьалчиз ам алахъда ви дабандал,
Яргъал акъваз, кьадач вун кваз дустуни,
Мез-гъвел ягъиз, къалурда гьакӀ кӀубанвал,
Таб я гафар лугьудай ваз дустуни.
Эцигиз кӀанз залан пар ви далудал,
Вилив хуьда ви агьузвал дустуни.
Хиянатвал гваз къвазда ви къуллугъда,
Гуьзлемишиз ви ажузвал дустуни.
Дуст авайди, акъвазмир вил хьана вун,
Эвел-эхир акъудда къал дустуни.
Аламаз гьакӀ гуьзелдал гуьл хьана вун,
Бедвилелди чӀурда ви кӀвал дустуни.
ДУСТУНИЗ
Меселла зун, къурбанд хьана сузадиз,
Низ суьгьбетин, дертлу я зун, азиз дуст.
Хиялдик кваз, ялварзава худадиз,
Низ суьгьбетин, дертлу я зун, азиз дуст.
Икьван инсан бахтсузвилик хьайила,
ЦӀай куькӀвена, жегьил уьмуьр кайила,
Мублагь дуьнья сузадик ваз къайила,
Низ суьгьбетин. дертлу я зун, азиз дуст.
Эхир гьалтна чарабурун гъилерал,
Нагъв ала зи залумри кай вилерал,
Физ жезмач хьи завай гила кймерал,
Низ суьгьбетин, дертлу я зун, азиз дуст.
Чидач заз, мус къахрагъда зун меселай,
Саидан тӀвар фидани икӀ рикӀелай,
Бес къведай кас амачни зи варТделай,
Низ суьгьбетин, дертлу я зун, азиз дуст.
ДУСТУНИЗ
Къазанмиш тавур девлет герек туш,
Чинал хкидай гьуьрмет герек туш,
ЧӀал маса гудай уьлмет герек туш,
ТӀварцӀиз лайихлу инсан хьурай, дуст,
ТӀарзавай рикӀяй суза тегьидай,
Негь тир хиялриз эмир тийидай,
РикӀелай авур гьуьрмет тефидай
Къанажагъ авай инсан хьурай, дуст.
КӀеве гьатайдан дерди аквадай,
Аялни герек итимдай кьадай,
Набуд мецелди гуьгьуьл тахадай
Камалдиз дерин инсан хьурай, дуст.
Уьмуьрдин яйлах хару гатайла,
Бахтун булахар вахтсуз кьурайла,
Хандин зулумди лап рикӀ атӀайла,
Сабурдиз ачух майдан хьурай, дуст.
ХъуьтӀерни гатар сад хьиз чидайдаз,
Дидени ватан вич кьван кӀандайдаз,
Саид ашукь яз сейли кьадайдаз
Уьмуьр бахтавар девран хьурай, дуст
ГЬАРАЙ
Мад рагь мугьман жезмач кӀвализ,
Зи пай кумач адак, эллер.
Кьара нурни къвезмач вилиз,
Ялиз хандихъ напак, эллер.
Вуч ийин за, низ хьурай ван,
Акъатзава гьарай физ чан.
За гьикӀ жуван къахчурай къан,
Хьанва закай лапаг, эллер.
ЛукӀвалнач за са чӀавузни,
Акунач жув яз ажузни,
КӀандай хьи заз рикӀ атӀузни
Хандин сада къвалаг, эллер
Кьуд пад чуьл яз акъудай цуьк,
Багъда, тама рахазваз нуькӀ,
Ветер гьал я хура зи рикӀ,
Хквен тийиз чӀалаг2, эллер.
Ильяс тир зун гьар са касдиз,
Женнетдин нур руьгьдиз хас тир.
Им гьи гьал хьуй, къе хъалхъас хьиз,
Къекъвез ава тарак, эллер.
Рейгьандин ни къвезмач нериз,
Саз язава рикӀел хериз.
Зун акур вуж ава хъвериз,
Михьиз хьанвай xapanl, эллер.
Кьуьчхуьр Саид, туькӀуьра чӀал,
Виче кьурай жемятдин тӀал.
Сурхай лугьур тух тежер мал
Кьирай кана кӀараб, эллер.
(Уьмуьрдин рехъ Ажугъдин шиирар Ашкъидин шиирар Къейдер)
