Мир - вашему дому, покой - вашей душе!
Ша чун таниш жен..
Гьуьрметлу дуст!
Ингье вуна зи ктаб кIелна куьтягьна. Лайихлувилерикай-кимивилерикай чун рахадач, ам ваз чида, амма завай са кар тестикьариз жеда: ана са къалп цIарни авач. Ам зи уьмуьрдин гуьзгуь я.
Зун I958 йисан 20 октябрдиз Кьасумхуьруьн райондин Пиперхуьре хана (бубайрин ватан Хъартасар я). Хуьр куьч хьана, ахпа чун Самурда яшамиш хьана.
Заз дах чидач: зун аял яз, ам гъуьрче, кьвалак акатна, кечмиш хьана. Зи рикIел етим аялвал хъсандиз алама. Гена ризкьидикай дидеди чаз дарвал ганачир: ада пуд чкадал кIвалахзавай - экуьнахъ фермадал фидай, ахпа школаяр михьдай (уборщица тир), гуьгъуьнай колхоздин никIеризни экъечIдай. Ада ялай кьван парар санал эцигайтIа, абурухъ дуьньядин заланвални хьун мумкин я. Гьавиляй я жеди - зи вири дердерал зи дидедин тIвар ала.
Зун кьведра бахтлу кас я: за жуван уьмуьр аялризни шиирриз бахшна. Вуч ава абурулай михьи, гуърчег! Алай вахтунда АрхитIрин юкьван школада кIвалахзава.
Зун, ихтилатрай, диде, кIвачерик ич акатна, алукьна, са шумуд йикъан фад дуьньядиз атана. Къведайла тади хьана - амма хъфиз тади квач.
("Гъетери табдач" ктабдай)
