Мир - вашему дому, покой - вашей душе!
САДА…
(Хъверни шел какахьна)
******
Сад гатун къуз куьчедал
Кавал алаз экъечIна.
Къунши вичин жуьреда
Адал хъуьрез эгечIна:
-Вучтинбур я кавалар,
Гатуз, ракъар акьурла?
-Акатзава, къунши, зак
Мекьи фул вун акурла…******
Сада вичин тарифун яз лагьана:
-За кьве паб я и яш хьана гъайиди.
Къвалахъ галай вад гъайида кьатIана:
-ЯтIа, дуст, вун тек кьведра я кайиди…******
Сада вичин рахкурнавай папакай
Са хъсан чIал кхьена,
Ам кIелайла, ада хкай цIийи паб
Сифте гъуьлуьк хъфена…******
Са езнеди, нагьакьан,
Вичин ирандидедиз
Хайи юкъуз гъвечIи гурцIул багъишна.
-Им зи квез я?- суалдиз:
-Ваз тежриба ава кьван,
Адакай заз са пехъи кицI вердишра…******
Сада кIевиз гьарайна:
-Къе квев гьуьжет кьада за,
Гьич са затIни галачиз,
Пуд кьатI эрекь хъвада за.
Гаф квадарнач кьегьалди,
Гьейранарна барменар…
Къени хъвазма илигна,
Анжах гила – дарманар…******
Къунши касдин тIвар гана
Сада вичин къудухдиз.
Адан папа гьа къалай
Язава лам къурухдиз.******
Сада вичин гададиз
Эрекь цана кIанивиляй.
Хци буба гатана,
Вичиз тIимил цайивиляй.******
Сада чирна вичин хциз
Кьил акъудиз чехирдай.
Гила чарар къвезва адаз
Яргъа авай Сибирдай.******
Ламра вичин гуьгъуьна
Душман ава лагьана,
ЧукIул гуьцIна, юзазвай
Хсуси тум атIана.******
Сада вичин папалай
Ийиз хьана тарифар,
Адан къвалав затIни туш
Лугьуз машгьур арифар.
Садра кIвализ хтайтIа,
Къунши аваз жагъана!
-Зун иниз, дуст, ви папан
Камал чириз атана…******
Дуьнья гьейран ийиз кIанз,
Са кас вичин супадиз
Рахаз чириз алахъна.Югъди супа гваз авай,
Гафар лугьуз,
Ам гъавурда тваз авай,
Вири крар къвалахъна.ГанатIани бул тарсар,
ТуначтIани садавни
Я кутIуниз, пар ягъиз,
Супадай чIал акъатнач.
Иесидик
Вичик хесет акатна,
Йикъа вадра ар ягъиз…******
Садаз вичин папахъай,
Цихъай цIуз хьиз, кичIеда:
Луьхъ тирлани, паб акур,
Ам вич вичел хуькведа.Межлисризни физва ам,
Гьар сеферда жибинда
Папан шикил эцигиз,
Пиян жедай арада
Ам акъудиз килигиз…******
Са кас нянихъ хатадай
Кьибле патаз килигна,
Ада, кIвализ хтана,
Вичин тIварцIихъ паспортда
«Гьажи» лакIаб гилигна.
