Мир - вашему дому, покой - вашей душе!
«МИШЕНАР»
1
Къарагъарнай чун йиф кумаз,
Акъвазарнай жергеда.
Вири авай ахвар кIамаз,
Пиянзавай жуьреда.Комбатдин сес хьанвай векъи:
-Дагъдиз душман атанва,
Садни кьвед ваъ, десте чIехи,
Яракьарни ацIанва.Чун машинрал хкаж хьанай,
Фенай дагъдин ценерал.
Экв жедалди агаж хьанай
Раган кIане къванерал.Чигит цицIиб какадай хьиз,
Ракъинай югъ экъечIнай.
Таквадайвал, далдадай хьиз
Чун дагъдиз физ эгечIнай.Амма вилик чIехи тIул квай,
Дагъ лалзавай хаиндиз.
Чак женгинин кьетIен фул квай,
Вучда течиз тайиндиз.Чи комбатди эвер гузвай
Рациядай штабдиз.
Туьнтдиз рахаз, сепер гузвай,
Са затI кхьиз ктабдиз.Секин хьанай, чав агатна,
ТIалабнай са пIапIрусни.
-Гьайиф, гьайиф акъатай йиф,
Хъсан хьанач са кIусни...-Низ чидай и тIул авай кар,
Къалурнавач санани.
Ингье чпин къул алай чар,
Гьич са гафни гьанани...2
-Чара авач, мад “мишендиз”
Фена кIанда, гадаяр,
Чир жедайвал чи “сиренриз”
Яракь алай чкаяр.Куьне хкягъ, пуд кас бес я...
Вич яргъал хьиз къекъечIнай.
Спичкадин кьалар кьуна,
Чун хкягъиз эгечIнай.Гьарда са кьал хкудзавай,
Тади квачиз, мажалдив:
Спичкадин кьаларив ваъ,
Чун къугъвазвай ажалдив.Ингье сада тухванай гъил,
Фена яргъал ацукьнай:
Спичкадин кьатIнавай кьил
Сифте гьадахъ галукьнай.Малум хьанай кьвед лагьайди...
Пуд лагьайдаз акъатнай –
Командирдин вилик фена,
Ам метIерал аватнай.-Им дуьз хьанач. Къуй вичини,
Итим ятIа, хкягърай.
(Кьалар гвайди зун тир эхир,
Ам гаф тир захъ гелягърай).Туртур хьана, къудгуннай рикI,
Гуя гуьлле акьуна.
Зун гадайриз яна гъилер,
Фенай яракь къачуна.КIвачерикай къванер хьанвай,
Хаз жезмачир метIерай:
Чизвай, ажал килигзава
Вилик галай кьветIерай.Муькуь кьведни агакьнай захъ,
ТIулан юкьвал атайла.
За гьарайнай! -Эрекь це, бах,
Зи сурун кьул атIайла!Эхиз хьанач душмандивай,
Эхир дагълар раханай.
Чун алай чил, гьакIан дуьз чил,
Къелеяр хьиз чкIанай.Бастурмишнай зун накьвади,
Чин элкъуьрнай экуьнихъ:
Вертолетар дагъдин кьилел
Куьрсар хьанвай ракъинихъ.Фад-геж чидач, зун гадайри
Накьвадикай хкуднай.
Командирди регъ ягъиз зи
ЧIарарай руг акъуднай.Са цIверехни алачтIани,
Ктаднавай ивиди.
Гьа легьзеда чир хьанай заз,
Галай кьведни кьейиди.Гьа фейивал, машинраллаз,
Чун частуниз хтанай.
Комбатди чаз, - Гила кIвализ
Чарар кхьихь, - лагьанай.3
Вуна кIусни фикир мийир,
Зи кефияр къумбар я.
Ина, диде, гьа чина хьиз,
Кьуд пад кьакьан дагьлар я.Къенин югъ чаз гьакI акъатна,
Меркездавай, Къабулда.
Анин халкьди чун лап хъсан,
Фуни кьел гваз, кьабулна.Етимхана ава ина,
Чна гузва куьмекар.
Чун атайла шад жеда гьа
Кесиб етим фелекар.Къвалахъ чIехи бахча гала.
Базардилай жагъурна,
А бахчадин кьиле къе за
Са ичин таз акIурна...
