Мир - вашему дому, покой - вашей душе!
* * *
ЦIур ийизва гитарадин симери –
Ватандикай мад за мани лугьузва:
Мад сеферда Шалбуз дагъдин синери,
Алмасди хьиз, зи шагьдамар атIузва.Ватан, Ватан, вун куьз икьван сефил я:
Дерейра дерт гваз къекъвезва гарари,
Налугьуди гьарма сад са кфил я -
Тикрарзава ви гъам къавах тарари.Зи патай ваз басхас хьайи кар авач,
Хва я зун ви, ихтибарсуз душман туш.
Ви сейлийрин сиягьда зи тIвар авач,
Гьадални зун гьич са кIусни пашман туш.Зиди вуч я - машгьурун вун чIалара,
Зиди вуч я – секиндаказ вун кIан хьун.
Гъед жедалди гъейри яргъал патара,
Зи мурад я ви часпардал са къван хьун.Ви гуьнейра дигмиш жезвай инияр
Заз масанрин пIинийрилай ширин я.
Самур вацIни, физвачтIани гимияр,
Зун паталди виридалай дерин я.Цуьквер ава, векьни такваз арадай,
Са чин хьана, ви махпурдин чIурара.
АкIурнава гуя абур гадади,
Гьарнай кIватIна, кIани рушан чIарара.Ватан, Ватан, къурхузвай заз азаб гуз
Суд-дувандал, эхирдин югъ атайла,
Мад кичIезмач – гила жеда жаваб гуз,-
Дуьньядал на вуч авуна?-лагьайла.Зун, жувазни бегьем хабар авачиз,
Къастарикай лап кьилиндав агакьна:
ГьакIан харчи хур гатунар галачиз,
Вун секиндиз кIан жез залай алакьна…
