Мир - вашему дому, покой - вашей душе!
ДУСТАРИЗ
Камаллу Камалдиназ
Къадирлу хва хьанач закай дидедиз:
Йисаралди гьич патавни хъфизвач.
За лугьузва - регъуь хьуй зи жуьредиз,
ГьикI я жузаз, кагъаз кьванни кхьизвач.Стхайризни бегьем стха хьанач зун:
Салам гана элясзава акурла,
МичIи тирла, абур патал канач зун,
Гагь къвалавни хьанач межлис кутурла.Багърийризни ийиз хьанач багъривал,
РикIелламач бязибурун тIварарни.
Тек гьабуру гьисснавач зи дугъривал,
Тек гьабуруз акунвач зи гьунарни.Лейли хьана гзафбур заз рушарни,
Сад хкяна - цIикьвед йис я паб хьана.
Вичиз къени авачтIани хабарни,
Садра-кьведра гьарам хьана, таб хьана.Тек дустариз вафалувал хвена за,
Хьана даим тек дустарин дидарда:
Гьар садан гаф, цIарара тваз, квена за,
Маса ганач, газарар хьиз, базарда.Аси ятIа, гъил къачурай худади,
Заз маса бахт кьисмет тахьуй, герек туш:
Туьд чуькьвейтIа, тIал лугьудай гьалкъади,
Дуст атурай - дарман, мелгьем куьмек туш.Алцумзава за дустарин рикIерал
ЧIехивални михьивал и дуьньядин.
Руг яз хьурай къуй гьабурун рекьерал,
Гъед жедалди гъейри угъраш мидядин.ЦIугъдайлани чан туьтуьна акIана,
Къуй дустарин хваш-бешди зун шадаррай.
Ахпа кIантIа Азраилди тухвана
Шалбуз дагъдин кукIушдилай гадаррай.
