Мир - вашему дому, покой - вашей душе!
ЗИ ШИИРАР
Зи шиирар кIел тавурай алчахри,
Гьабур патал йифен ахвар ханач за,
ЦIай кутуна хура авай чахмахри,
Жегьил уьмуьр гьабур патал канач за.Гьабур патал экъечIнач зун майдандиз,
Гьар сеферда кIудиз рикIин дапIарар.
Шиирралди къуллугъна за ватандиз,
Яру хьана ифидалди дамарар.Четин тирла, кьил кIевера акIайла,
Лагьанач за,- Багъри ери такIанда.
Къекъвенач зун гъейри къулай чкайрихъ,
Кесибвална жуван кесиб ватанда.Зи шиирар кIел тавурай ажузри,
КIелайтIани, бажагьат чеб шад жеда:
Тади гана зи сергьятсуз ажугъди,
Валлагь, чпин гъвечIи рикIер пад жеда.Темягь фена, чими ийиз агатай,
Куда абур зи ашкъидин цIаяри.
Къерех хьурай, квахьна санихъ алатрай,
Бахтикъара тавурай чеб гьавая.Зи шиирар кIел тавурай авамри,
И дуьньядин писни хъсан такунвай.
Келле буш яз, мекер расиз, цIалцIамриз,
Уьмуьрдин тек шад терефдихъ агъунвай.Зи чIаларал гагь хина, гагь кьел ала,
Гагь вирт я, гагь туршивал гва къвакъварин,
Зи чIаларал чIур тежедай гел ала
Зи ширин дуст Шабатован накъварин.
Зи шиирар кIел тавурай хаинри-
Беденда бунт къарагъарда ивиди,
Гьелекда чеб гьар сеферда ифинри,
РикIел хкиз ватан маса гайиди.Зи чIаларихъ ни гала зи ватандин,
Зи чIаларал хайи чилин ад ала,
Зи чIаларал, кIантIа хьуй чеб гьулдандин,
Гьар душмандин хур къазундай яд ала.Къизилар хьиз, акъудзавач чувалрай,
Кхьизва за гафар рикIяй къведайвал.
Зи шиирар кIелрай анжах кьегьалри,
Хайи чилин къаравулар жедайвал.
