Мир - вашему дому, покой - вашей душе!
УЬМУЬРДИЗ ГИМН
Сагърай цавар, сагърай гатфар, гуьзел тир,
Цуьк акъудна, дуьньядикай пIирзавай.
Кьуьдни сагърай, зулни сагърай, чIимел тир,
Чаз ракъинин халис къимет чирзавай.Сагърай дустар, писдайла рикI къачузвай,
КIани ярни, гадар жезвай гардандиз,
Сагърай тостар, дидейрикай лугьузвай,
Абуру чун акъуднава майдандиз.Яшамишрай стхаярни багъри тир,
ГьинватIани, гьай жезвай чи гьарайдиз,
Мукьвабурни, гъейрибурни дугъри тир,
Рахаз-хъуьрез, тазвачир чун субайдиз.Дагълар сагърай, чирзавай чаз кьакьанвал,
ГьакI вацIарни, югъди-йифди рекьевай.
Къулп хьурай чи кIанивални такIанвал,
Эквни мичI яз гьамиша чи рикIевай.Ажеб дуьзгуьн туькIвенвачни тIебиат,
Гьич сад кьванни артух-уьскуьк затI авач.
Сагърай, сагърай чи уьмуьр, чи гьакъикъат,
Куьз лагьайтIа чахъ уьмуьрар мад авач.Гьисабнава чун къекъвезвай къадамар!
И дуьньяда вири туна авайвал,
Югъ, йиф, чил цав – вири хъижез давамар,
Чун хъфида, вахт хьайила, атайвал.Рекьер сагърай! Вучда абур тахьайтIа?
Абурай чун физва дагъдин кукIвални.
Сагърай, сагърай, виш йисалай атайтIа,
Чаз виридаз гьакьван такIан ажални…
