Мир - вашему дому, покой - вашей душе!
ЗУН ВА НАПОЛЕОН
Наполеон хьана даим гьуьндуьрда,
Европадин тIем къучагъдик акакьнач.
Гьакьван крар авурдалай уьмуьрда,
Са дишегьли муьтIуьгъариз алакьнач.Гадарзавай юкъуз адан кIвачерик
Яд уьлквейрин пайдахар гъиз,пекер хьиз,
Амма кIани папан вилик йифериз
Вич метIерал аватзавай, нуьквер хьиз.-Жозефина! А гуьрчегвал гьинай я?
-Жозефина! Гьикьван на зун гьелекда?
Ви хъвер такун заз гьар чIавуз кьинай я,
Вири гъида, анжах лагь, вуч герек я.Саймишзавач, наз гуз анихъ элкъвезва:
-Ви вахари хкудзава фитнеяр.
Бонапарта мадни сарар регъвезва:
-Валлагь хьи, чеб за ийида тикеяр…Вири гьакIан багьнаяр я, багьнаяр,
Париж рикIе акъатнава таватдин:
Чар къачунва, ч1ур жедалди гьаваяр,
Хъша лугьуз, ашнадилай нубатдин.-Зун тек тамир, вуч хуш ятIа, гьам ая,
Ашнани яхъ аскеррикай кIаниди.
Ша, зав агат, зи къаршидиз кам ая,
Заз уьмуьр туш вун галачиз фейиди.Амма файтун гьазур хьана гъенелла:
-Къарагъ, къарагъ, зи рикI тIармир гьавайда,
Такурай вун метIераллаз, чилеллаз,
Рак ачухна, са чара кас атайтIа.-Зун хуькведа…Рекьин пулар гьазура,
И сеферда гзаф хьанва буржарни,
Гъваш кван, жуван талатунар юзура,
Амалармир кьуьзуь мискьи къажардин.Жозефина хъфена руг кьилеллаз,
Император накъвар михьиз амукьна.
Папа кутур хъел жидайрин кIвенкIвеллаз,
Пака юкъуз Италидихъ галукьна…Бонапартар вужар я зи къаршида?
Дуьз я – завай къачуз хьанач уьлквеяр,
Амма жуван са гъвечIи тир яшинда
МуьтIуьгъарна за гьи кьадар бикеяр!…
