Мир - вашему дому, покой - вашей душе!
САМУРДИН ТАМ
Махуниз хьиз, гьахьзава зун.
Самурдин тамуз,
Зулун юкъуз.
Дугъриданни, махарик квай девди хьиз,
Са нефесдал хъвазва ада
Самур вацI
(Адан кьере
Балугъчияр ацукьнава
КIирер гваз,
Самур вацIун хъуьчIуькай
Хкудзава градусникар -
Форелар).Сармашугъра ава тарар -
Кьенеррава, шивер хьиз...Сих тупIарин арадай
Алциф яд хьиз,
Сих тарарин арадай
Авахьзава алциф цав.Тамам гьар са тарцин пуна
Къарникъузар ава ина,
Фесер алай Вьетнамадин рушар хьиз.Цеквер чпин кIунтIарал
АлтIушнава, микьнатIисдал
Ракьун куьлуь кIусар хьиз.Сармашугъра ава тарар -
Кьенеррава, шивер хьиз...Пешер къвазва,
Зи кIвачерик чкIизва.
Цава - гьарай,
Цавай ингье
Мад са къифле къушарин
Яд уьлквейриз хъфизва.
Яраб пешер, зи кIвачерик чкIизвай,
Чарар ятIа,
Абуру заз кхьизвай?Сармашугъра ава тарар -
Кьенеррава, шивер хьиз.Ван акьалтна,
Мишерралди фялейри
Мегъуьн тарар хкатIзава,
Лезги рушан кифер хьиз.
Зун физва...
Куьтягь жезва Самурдин там -
Агъзур шив квай мах.
