Мир - вашему дому, покой - вашей душе!


Пуд гъвечIи шикил


Сел

Дустунин ими кьенва лугьуз хабар агакьнава. Жегьилзамай итим тир, рагьмет хьуй вичиз. За, тазиятдал финин мурад аваз, перемар алукIзава.
-Винидихъай къвезвайди масад я. Цавни чил сад хьанва,- хабардар ийизва зун къецелай хтай папа.
-Физвайди ятIа, тади ая.
За кIвачин къапарал гъил вегьинни сад хьана, шуьшебендди далдамар ягъунни. Зун къах хьана килигиз амукьнава: тупIун рикIер хьтин харар къвазва цавай, цIайлапанар язава, къукърумар ийизва – гуя къурхуяр гузва цаву чилиз.
Къуншидин гьуьндуьшкадин шарагар зирзибилдин фура тун патал гъанвай ракьун челегда гьахьнава. Кисна акъвазнава. Гагь-гагь, чиле акьаз, бочкадин къенез гадар жезвай харариз кIас ягъиз алахъзава.
Хар къвазмач, сел акатнава – на лугьуди дуьньядикай са чIехи гургуш хьанва, гьа саягъда къвазва сел.
Вад декьикьани алатна – хкатнач.
ЦIуд декьикьа фена – къвазма.
Зур сятинилай сел куьтягь хьана.
Цавар гьалчIнама.
Зун, мад марф акатдалди ясдал агакьдайвал, тади кваз куьчедиз экъечIна. Булахдин рекьел агакьайла, серсер хьана амукьна: куьчедин юкьвай, хвал атIана, тамам вацI физва.
Зун, вичин гъенел акъвазнавай, вилериз аквазмачир Сурхай халудин патав фена. Салам гузни агакьнач, куьчедин агъа кьиляй «КIвалер ацахьзава!» ванер акъатна.
-Куьчедихъ галай цал атIутI лагь,- теспача хьана Сурхай халу.
-Лагь, яда!- эцязава ада чиле аса…
-Аниз итимар фенва, Сурхай халу, жув секин хьухь,- кьейи чкадиз физ кIан жезва заз мад.
-Ихьтин аламатар акурди туш заз, жуван 80 йисалай алатнаватIани, -ихтилат масанихъ хазва кьуьзуьда.
За винидихъди еримишна.
-Вири Чеченда хъиткьинарзавай бомбарин гьунарар я гьа,- яргъай хьиз ван хъхьана заз Сурхай бубадин аламатдин гафар…

Гьа-гьа-гьа!

Цавай цIай къвазвай гатун югъни куьтягь жезва. Чиналлай руквади африканвидиз ухшарнавай итим, кьуьл ийизвайда хьиз, гъил хкажна кьунвай комбайнидай эвичIна, къвалахъ галай машиндал атана.
-Вуч хьана?
-ЗатIни. Мирим чарарал кумукьна. Пул гвач лугьуз, туьквендал физвач.
-Аламаз къачурай ман. Алад, я Мирим, бес чна руг ацукьнавай туьтер михьдачни?
Пудра «Гър-р-р» авуна, машин чкадилай юзана. Хуьр галай патахъ рекье гьатна.
Туьквенчидин кIвал хуьруьн кьилихъ гала.
Эверна:
-Балафенди! ( амай чIавуз «БалацI»)
ЭкъечIдай кас авач.
-Куьн кьенвани, кIвал чIур тахьайбур? Итимдиз гьай лугьудай кас амачни ина?
-Вуж я?- дакIар ачух жез-жез.
-Зун я, ви стха Мирим.
-Вун хьтин стхаяр заз Китайда са миллиард ава. Пул гвани?
-ЭвичI ман, пул…пул…
ЭвичIна. БалацI хуш акунрин итим я. Вилер цIару. Луту хьтин.
Жузунар – качузунар.
-Вуч кIанзава?
-Пуд эрекь, хъсанбурни хьуй, ажузбурни.
-Вун, кьарай атIайди, гьа къаравилийрик квай хьтинди я
-ГьикI?
-Кьвед гьуьжетра гьатда. Садаз сад гафаралди тухуз кIанз. Хабар ракъурда, бес са кал суракь ая лугьуз. Вични я яруди, я лацуди, я чIулавди тежервал. Са вад йикъалай жаваб вахчуда ада муькуьдалай: бес ахьтин кал жагъанва, амма ам хутахиз я юкъуз, я йифиз татурай…
-Гьа-гьа-гьа! Фу авани кIвале?
-Зарема, суфрадикай са фу гъваш, чан руш…
-Салак серкер квайтIа яраб?
Серкерни гъиз туна.
-Са кьве кIус нисини…
Гъана.
Гана.
-Афнияр рикIелай алатзавай.
Мад руш ракъурна.
-Кьелни це.
Гана.
БалацI Миримаз килигзава, Мирим – БалацIаз. ЗатIни кIамай хьтинди туш.
-Ма, и спичкани.
-За адакай вучзава?
-КIвалеризни цIай хъиягъна ахлад!
-Гьа-гьа-гьа!

Аса гвай Наполеон

И йис хьтин чIимелди белки садрани хьанач жеди. Илаки ЯркIи пата. Такъвай югъ авач. Экуьнахъ, аквада ваз, рагъ ава, нисинихъ цав чIулав жез башламишда, нянихъ – тIурфан. Ва я аксиба – экуьнахъ къваз, няниз – рагъ къвез. Куьрелди, такъвай югъ авач. Кимел итимри
ихтилатарзава. Куьне фикирзавай квекай? Гьелбетда, гьавайрикай.
-Экуьнахъ дуьньяда авай кьван вири цифер Цаванда кIватI жезва. Совещанидиз. Гьиниз фидатIа, меслятар ийиз. Сад-кьвед инихъ-анихъ алатда, амайбур вири ина акъваззава. Санихъни чIарни юзан тийиз…
-ЦIи векьерни ягъиз жедайди туш, ктIида…
-Картуфарни ктIидайди я…
-Асивиляй Аллагьди гузвай жаза я…Зи сивяй мез аватнай, мискIин куьтягь лугьуз,- аса чиле эцязава Рабадан бубади.
И ихтилатрик кумаз, агъадихъай, нинияр хьиз, безетмишнавай тIваларни гваз аялар акъатна:
-А Гуни, Гуни, чан Гуни…
Эхирдай вирида сад хьиз:
-Ракъар, варцар инихъди,
Цифер, марфар анихъди…
-Исятда, исятда,- аса чиле эцязава Рабадан бубади. – Цаварин вил и квез кьве лахъу кака гунал алай! Исятда хкякьда! Кяфиррилай хьайи кяфирар!
-Бес вуч ийида, я Рабадан буба?- хкуьрзава адак вилери цIарцIар гузвай Чигира.
-МискIин куьтягь лагьанайни за?- вичин даллай язава кьуьзека.
-Лагьанай, лагьанай…Куьтягьда ам чна. Исятда вуч ийида?
Садани чуькьни ийизвач.
Кьуьзекани.
Бирдан кIевиз, къвала гъуд эцягъайда хьиз:
-Хъфена якIв гваз хъша,- къарагъна ам кIвачел. –Хци якIв.
КIвалер патав гвай Магьмуд, кьилел пенжекни кьуна, хъфена.
Гваз хтана.
Рабадан бубадив вугана.
Вичи-вичик мурмурар ийиз, тупIалди ахтармишна якIвун хцивал. Ахпа мурз винеллаз эцигна ам
марфадик. Кимин вилик квай асфальтдал. Мурцал аватзавай стIалар якIву гьасятда атIузва.
Гьа икI са кьве декьикьа кьван давам хъхьана.
Анжах кьве декьикьа.
Ахпа…Аламат! Марф хкякьна.
Рабадан буба, чуькьни тавуна, куьчедай агъуз вичин кIвалералди хъфена.
Гъалибчи хьиз.
Наполеон хьиз.
Аса гвай Наполеон.

 

 

На титульную страницу >>>

 

Цитата месяца: "Целые народы ненавидят уроды" М. Бабаханов

 

Сайт управляется системой uCoz