ПАГЬ, ЗИ КЪИЛИХ…
Зун масад я – къилих кицIин къилих я,
Са кардани заз кьадар чир хьайид туш.
Белки гьунар, белки ам зи синих я,
Зун садрани куькIуьн тийиз кайид туш.
Ифирна за гьар къаршидиз атайди,
Бугъ акъудиз, гум хьиз кIвалин гурмагъдай.
Шукур Аллагь, зун Сибирда тахьайди,
Адан даим чIагай чилни авагъдай.
КIандай чIавуз кIан хьана заз адетда,
Яр паталди чанни гуз зун гьазур тир.
Адан хатур хайитIа са небгетди,
Пагь, гъутар зи путарилай агъур тир.
Дуствилинни медни хъвана, агъуни,
Дуствиле зун Эверестдиз акьахна.
За къедалди, аватIани чагъуна,
Рушарилай дустар гзаф къужахна.
Ишехьна зун, дуст сефил яз акуртIа,
Ам шад тирла, кьуьлерна за хкадриз.
Гьазур тир зун, адак жизви хкIуртIа,
Чилин шарни техквер патахъ авадриз.
КIвал авачиз, вири дустар агакьдай,
РикIе гана виридаз за чкаяр.
Къуй гьисабрай, хва аватIа алакьдай,
Абур галаз за хъвайи кьван такъаяр.
Къе вуч хьана? Багърийрин къаст къал я хьи,
Тикрарзава,- Гила кьванни секин хьухь!
Зун паталди ам акI лагьай чIал я хьи,
Чан аламаз суруз хъфиз кIвачин хьухь.
АкI ятIа рагъ кун тавуна акъвазрай,
АкI ятIа гар чуьнуьх хьурай кьветIера.
Къуй кьисметди, кьел ягъиз, хам алажрай,
Аватдач зун адан вилик метIерал.
Инкарзавач са карни за, авур кьван,
Накь кIан хьайи са карни къе такIан туш.
Акатайдан тIуб мецерик хкIур кьван,
Сес акъудиз зун шаркь патан чIагъан туш.
Дуст галачир уьмуьрдикай вучзава?
Муьгьуьббатсуз рикIикайни къван хьурай.
Заз гьа жуван кицIин къилих хушзава,
Масабур къуй масабуруз кIан хьурай.
На титульную страницу >>>
