Мир - вашему дому, покой - вашей душе!


КЬУЬЗУЬДИ

 

Гьар йифиз заз аквазва вун ахварай,
Мад вуч хьана, тIазвани вун, кьуьзуьди?
Гьикьван гагь я, авач вакай хабарар,
Зунни квахьна, ЯркIи патаз фейиди.

Ни фикирнай, ина икьван вахт жеда:
Къени ама, тек са йисал разиди.
Вавай яргъа закай пудра дах жеда,
Ни фикирнай, ни фикирнай, кьуьзуьди?

На лугьуди виридан зал вил алай –
Империя зи къужахдиз чукIурна.
Буьркьуь лекьре, ажайиб, кьве кьил алай,
Вичин къармах зи кьаскьанда акIурна.

Юзаз жезмач са патахъни, кьуьзуьди,
Къахнава зун, хашуналлай Иса хьиз.
Фад вахтара саналлаз чун хьайиди
РикIел къведа гагь-гагь куьгьне кьиса хьиз.

Гьар йифиз заз аквазва вун ахварай,
Вуч кар ятIа, гьеле зазни тайин туш.
Вал кьил чIугваз хуькведа зун мукьвара,
МасакIа рикI секинарун мумкин туш.

Гъил кьуна зун хутах садра булахдал.
Хъижезмачни? Бизарнани купулри?
Я тахьайтIа,хъияхъ садра къужахда.
Гьамни завай къакъуднани хтулри?

Ви вилик зун гьамиша я куьлуьди.
Килигмир зи рехи хьанвай чIарариз.
Са кардихъай кичIе жемир, кьуьзуьди, -
Кьил хъиягъдач мад за надинж крариз.

Ваъ, мажбур я са аялвал тикрариз:
Агакь тийиз накъвар кьулухъ туькьуьниз,
Къуьнераллаз фидайла вун сурариз,
Шехь хъийида садра зун ви гуьгъуьниз...

.



На первую страницу >>>




 

Цитата месяца: "Целые народы ненавидят уроды" М. Бабаханов

 

Сайт управляется системой uCoz