Мир - вашему дому, покой - вашей душе!


КУЬГЬНЕ КИНО

Чи хуър пара гъвечIи тир,
Гьич садрани къалурдачир кинояр.
Къунши хуьруьз фидай чIехи гадаяр.

Амма садра
Киночиди райондай
Вичихъ галаз са дишегьли хканай.
Папахъ галаз ккIанай.
Аппаратар къачуна,
Вичин цIийи пабни галаз
Ам чи хуьруьз атанай.

ЧIехибуру ам вирида негьзавай,
ГъвечIибуру икрамзавай папазни.

Абур кьведни ксузвай,
Аппаратар авай кIвале, клубда.
Хуьруьнбуру абур кьведни негьзавай -
Чи хуьряй тир сифте паб -
Хуьрекхана авачир,
И кьве кIвалах себеб яз,
Кинодин тIвар алай чарчин кIаникай
Пайда хьанай кхьинар:
“Са серия - 20 кепек (я кьве кака),
Кьве серия - 40 кепек (кьуд кака)”.

Гьа чIавалай икрамна за верчериз,
Вири-вири манийрилай
КIан хьана заз къакъраяр!
Какадаллай
Кьуд верч тир чаз авайди,
Кьве стхадиз.
Са серия хьайитIа,
Стхади зун тухузвай,
Кьве серия - кьудни вичиз кьачузвай.
Гьавиляй я белки къени
ТакIан я заз кьве серидин кинояр.

...Дяве физвай сегьнеда,
Аппаратар авай кIваляй
Къайгъанахдин ни кьвезвай.
Азиз рикIиз играми тир шикилар!

Са йисалай
Киночиди цIийи пабни рахкурнай.
Аппаратар ламрал яна,
Чпин хуьруьз хъфидайла,
Чна рекье тунай ам.

Адан вилел накъвар алай.
Чна ахпа гьуьжетнай,
Накь кьалурай кинодай нихъ
ШехьзаватIа
Киночи.
Амма кIвале дидеди заз лагьанай:
-Адаз вичиз гада хьана кIанзава.

 

 

На первую страницу >>>

 

 

Цитата месяца: "Целые народы ненавидят уроды" М. Бабаханов

 

Сайт управляется системой uCoz