Мир - вашему дому, покой - вашей душе!
КЬУДАР
*********
Ватанар гьвечIибур жедай туш.
ГъвечIибур жериди рикIер я.
Уьмуьрар куьруьбур жедай туш.
Куьруьбур жериди рекьер я...*********
Ватандин сан алцум жедач
Камарални чипIерал, -
Ам алцумиз жеда анжах
Адахъ кузвай рикIерал.*********
Вири ава дуьньяда кьве жуьреяр:
Са хъсандаз са писдини акси я.
Амма, заз чиз, писбур авач дидеяр,
Дишегьлияр ава, зунни рази я.*********
Виридалай инсан цавуз акъатда,
Гьуъндуьрдавай гъетерив кьван.
Виридалай агъузни ам аватда –
Маса касдин метIерив кьван...*********
Акьулдинни ахмакьвилин тафават
КIан таквадай дагьаррилай дерин я:
Ахмакьвили акьуллувал ийидач,
Акьулдивай ахмакьвал хьун мумкин я.*********
Алцум жедач дугъривал
Асландин кьил тахунал.
Дугъривилин уьлчме я,
Хуькуьр тавун цекверик...*********
Бахтлу хьана жув кIанзаватIа ваз,
Фу паймир вуна душмандихъ галаз.
КватIа къагьбе тIул, папахъ галаз - къул,
Дустунихъ галаз паймир вуна пул.*********
Виридалай чIехи гъалатI
Виридалай гьвечIи чIавуз
Авуна за –
Зун дуьньядиз атана.*********
Вуж ахмакь я, вуж акьуллу
Четин туш кьатIуз:
Тахсир квайла, акьул чилиз килигда,
Ахмакьвал - цавуз.*********
Вун кьил цава акьаз-такьаз къекъвезва,
А дамах ваз гьинай я, ни гайид я?
Гьикьван вуна гардан тикдиз кьуртIани,
Вунни, дуст, кьил агъадаваз хайид я...*********
Гагь факъир я, гагь регьимсуз жаллатI я,
Гагь халикь хьиз аквада ваз, гагь тифрикь.
Уьмуьр вуч я? ЧIехи тир пуд гъалатI я:
Сад хун,
Садни яшамиш хьун
Ва кьиникь...*********
Гьар са рикIе аялвили ванзава,
Вирибуру адаз минет - чанзава,
Садра кьванни хуькведайвал,
Фикир- къайгъу тежедайвал.
Зазни а вахт хтанайтIа кIанзава,
Диде жегьил хъижедайвал...*********
Гьар сеферда цIийи дустар жагъай кьван,
Тежер кьадар шад жезва зун, пашманни:
Гьар са цIийи дустуни заз, агъа кIан,
Багъишзава са артухан душманни.*********
Гьар хъунал рикI алайда квез лугьуда,
Фейжандилай къубадай хъун залан я.
Дугъри жеда, дугъри жеда фейжанар,
Амма гъвечIи къубайрин тIул яман я.*********
Дагъви физва,
Буйдиз тIимил аскIан я,
Къвалав паб гва - тамам кьведра кьакьан я,
Рахаз-хъуьрез чпин сефер гьялзава, -
Валлагь, халис дагъви я -
КIан хьунани кьакьанвилихъ ялзава...*********
Зи дагълара, кьакьанзавай цекверни,
Кьве затI ава аскIанвилин гьакимар:
Парце авай папан чекмед кIанерни
Парцевай паб рахкурзавай итимар.*********
Зун халкь хьана гьикьван вахт я! Къедалди
Заз гьамиша рагъ, цIай кваз куз, акунва.
Кудачир ам, язух, икьван яргъалди,
Заз чиз, а цIай дишегьлиди кутунва.*********
Зунни зи дуст акъвазнава куьчедал.
Экв аквадай перем алаз,
Са руш физва виликай.
Дуьз хъийизва айнаяр зи дустуни…*********
Ингье за ваз темен гузва мад, гуьзел,
Агъузна кьил, умудрикди дакIунвай.
Гуя зун я емиш бул тир тарцин хел,
Вунни ача, ам хуьн патал кутунвай
-Бес заз квехъай кичIе хьурай на кьунвай.*********
Инсан патал дуьнья кьве къан кьефес я.
Чун туьхуьриз, шеминиз хьиз, уф бес я:
Къелемни кваз кьунва чиле дувулри,
Чун кьунвайди са тах кьуру нефес я...*********
Ичин тарциз тегьне яна къавахди,
- Зун кьакьан я, гъвечIи вакай вучзава?
- Зунни белки кьакьан жедай гьа вун кьван,
Са пай миже за емишриз пучзава.*********
Кьве чIал чида заз жуваз:
Лезги чIални урус чIал.
Зи намусдиз чидайди
Тек са чIал я - намус чIал.*********
Пагь, чна уьмуьрда шумуд рехъ атIузва,
Са гьиниз ятIани геж жез чаз къурхузва
ДатIана катунар гьаваян азаб я –
Чун вири рекьери сурариз тухузва...*********
Расал хьуй зун душманвиле
Кьегьалрин са сихилдал.
ГьакIан буьркьуь такIанвиле,
Гьалтдалди са пехилдал.*********
Регъуь жемир кIусни рехи кьилихъай,
Ам акьулдин лишан я.
Эгер вунни рехи ятIа, Шалбуз хьиз,
Вунни, гьам кьван, кьакьан я.*********
Рагъ авайла, вири дустар, хъенар хьиз, вахъ галаз жеда,
Гагь виликай, гагь кьулухъай, гагь къвалахъай акваз жеда.
Амма серин хьайи чIавуз, хъенрин жуьре, квахьда дустар,
КъекъвейтIани жагъидач ваз, абур вавай яргъаз жеда.*********
Са ахмакьди, гаф лагьана са нагьахъ,
Халкьар твада дяведа.
Халкьаривай секин жедач са ахмакь,
Къал-къиж хьайи вядеда.*********
Сурун къванерин арада аваз,
Уьмуьрдикай ни авуртIа фикир,
Гьада кьатIуда и дуьньядин сир!
Ярх жезва инсан –
Къарагъзава къван...*********
Хайи Къавкъаз кьакьан чил я,
Цав ватан яз хкягънавай,
Урусатдин крар акваз,
КIвачин кьилел къарагънавай.*********
ЧIехи цлахъ жеда чIехи душманар,
ЧIехи варцихъ дустар жеда чIехибур.
Бес вуж жеда, де лагь, чIехи дакIардихъ?
-Угъриярни кIанибур...*********
Шалбуздин кукIвал
Гьалчналди ккIал,
ЗатIни жедач гьич:
Са ккIалдин кьван
Хъижеда кьакьан
Мадни Шалбуз вич
