Мир - вашему дому, покой - вашей душе!
ХАЙИ ВАТАН, ХАЙИ МАКАН...
Хкязавач чна хадай чкаяр,
Гьина хана - гьам ви багъри ватан я.
ХьайитIани ам къванерин хараяр,
Ваз, адавай къакъатайла, залан я.Ухшар хьана муг квахьнавай лифериз,
Ви хиялри дуьньядал цIар илитIда.
Ахварайни, хъша лугьуз, эвериз,
Ватанди вун гьар сеферда ицитIда.Къанни вад йис, къанни вад йис алатна,
Ви чIурарал за кам эциг тавуна.
Эхирни зун къе ви патав акъатна.
Вахтунизни кьит тир килиг тавуна.Хайи макан! Вун зи чан, зи гуьгьуьл я!
Вун аваз хьун - гьам бахтарин бахт я зи.
Заз ви гьар са кIеви къванни хъуьтуьл я.
Гуя гьар сад пачагьвилин тахт я зи.Ваз чидай зун анжах гъвечIи аял яз,
Маса къатда акунвачир къедалди.
Жуван уьмуьр гьиссзавай за завал яз,
Къе, ви хурал кьаткайла, шел къведалди.Аял тир зун, кьезил тир гьа вахтара,
ЦицIрен жуьре, хкадариз къекъвезвай.
Гила, рех квай кьил акIурна цавара,
Заланзава, къван хьиз, гьар кам вегьезвай.Кьурай чилел гелер жезва, фейила,
-Къе са юкъуз эхи ая, минет я.
Дуьнья гьакI я, садаз регьят хьайила,
Са масадаз четин жедай адет я.Зун мурадрихъ гзафбурухъ агакьнач,
Белки зегьмет герек кьадар чIугунач.
Залай ви тIвар сейли ийиз алакьнач,
Амма за ам беябурни авунач.Жув гунагьрин кIватI яз, масад айибнач,
Гаф лагьайдаз жаваб гана алазни.
За жувани цвекрелни гуж гъалибнач,
Асландивни кIур гуз тунач жувазни.Къанни вад йис, къанни вад йис тахтайди,
Эхирни зун кье ви патав хтанва.
Чи бахчада къелемар тир авайди,
Са бязибур сурни хьана ктIанва.Хайи макан, ви хиялда аматIа,
Чи къуншидал са руш алай, хват хьтин.
Ам исятда яраб гьина аватIа?
Гьалт хъувуртIа, тIвар чизма лагь заз вичин.Белки гьахьтин кьисмет хьана гайиди.
Заз кьвед лагьай сеферда вун жагъанва.
Ви патав зун, аялзамаз фейиди,
Пуд аялдин буба хьана хтанва.Белки ам зи жаза къведай тахсир я,
Зи веледар хана маса патара.
Вун абуруз таниш тушир са хуьр я,
ЧIехи буба кучуднавай сурара.Масад жедай зун, масана ханайтIа,
Маса гафар къведай рикIин табагъдай.
Нагагь ахьтин мумкинвал заз хьанайтIа,
Мад сеферда ватан яз вун хкягъдай.И дуьньядай гьар са бенде хъфизва.
Са вахт къведа, зи беденни рекъида.
Зун, гьина чан гайитIани, заз чизва,
Халисандиз ви сурара рекьида.
