Мир - вашему дому, покой - вашей душе!
ГЬУЬРМЕТ
(Баллада)
Са дагъвидиз, къарагъайла, гьаятдай
Пуд балкIандин гелер фенваз акуна.
-Гадаярни кIвале ама исятда,
Вужар хьурай? Тадач хьи чир тавуна.Кьакьан дагълар, дере-тепе атIана,
Агакьна ам эхирни пуд атлудихъ.
Вилик фена, салам гана, рахана:
-Куьн вужар я, гел тунвай зи парудихъ?-Зун Муьгьуьббат,
-Зун Берекат,
-Зун Гьуьрмет,
Икьван гагьди, дагъви, чун ви кIвалевай,
Къе хъфизва, ийимир на чаз туьгьмет,
Аквазвайвал, масаниз физ рекьева.Гьарай галаз, “вагь” акъатна дагъвидай:
-Куьн авачир кIваликай за вучзава,
Вуч авуна за ахьтин куьн хъфидай?
Вучиз куьне зи кIвал, зи югъ пучзава?Закай вучда, захъни са тур гелягъа!
Эхиркини дагъви язух атана,
Сад акъвазун кьетIна:
-Дагъви, хкягъа!
-Пуд хва ава, жедач меслят тагъана.Мад вучда кьван, пудни кIвализ хтана.
Пуд хцизни эвер гана бубади.
Кардин тегьер гьа легьзеда кьатIана:
-Къуй Муьгьуьббат, - кьатIна чIехи гадади.-Зал гьалтайтIа, къуй берекат акъвазрай,
Ризкьи кими тахьурай чи суфрадал,
Каш лугьур цIай чавай даим яргъазрай, -
Гаф атанвай имни кьулан гададал.ГъвечIи хци башламишна секиндиз:
-Муьгьуьббатни, Берекатни куьмек я,
Зи кьатIунрай, къвезвайвал зи зигьиндиз,
Виридалай Гьуьрмет, буба, герек я.ГъвечIи хцин гаф гьуьжетриз вегьенач –
Икьрар тирвал Гьуьрмет кIвализ хтана.
Берекатни, Муьгьуьббатни хъфенач, -
-Ам тахьайла, чунни жедач, - лагьана.
