Мир - вашему дому, покой - вашей душе!


ГЬУЬЖЕТ

(Риваят)

Сад тирдини Азраил
Хьана садра гьуьжетар,
Инсанри низ ийизва
Лугьуз пара гьуьрметар.

- Заз инсанрин ацукьун –
Къарагъунни таниш я.
Инсан вични зи тарцел
Дигмиш хьанвай емиш я.

Алахънава заз чириз
Вун къе адан хесетар?...
Ийиз хьана Аллагьди
Азраилдиз туьгьметар.

-Ви тIвар кьурла гьар садан
Ивини кваз рекъизва.
За халкьнава инсанар,
Вуна абур рекьизва.

-Зурба я вун, шак алач.
Сагъ дуьньядин сагьиб я.
И карда вахъ гьуьжетун,
Дугъриданни, айиб я.

Цаваралла гьамиша,
Вун чиливай яргъазва:
Заз лагьайтIа, инсанар
Гьар са юкъуз аквазва.

Зибур гьакIан гафар туш –
Бине аваз рахазва, -
Куьз ятIани инсанар
Валайни захъ агъазва.

Рази хьана кьве падни
Квез я вегьин пакадал?
Ахтармишда кардин кьил
Фена чилел, чкадал.

Сифте гьалтай са хуьре
Къазмадин рак гатана,
ЭкъечIайдаз Аллагьди,
Вич вуж ятIа, лагьана.

Тавакъу я, гъил къачу,
Инжикли хьайитIа,
Гишинзава, жедачни,
Са тике фу гайитIа...

Ваъ, - жавабна инсанди,
Ваз гудай фу авай туш,
Вавайни заз садрани
Са хъсанвал жагъай туш.

Бязибуру кеф чIугваз,
Зи жигерар кьурурна...
Серсер хьайи Аллагьдиз
Вичин далу къалурна.

Азраилдин нубат тир –
Къазмадин рак гатана.
ЭкъечIайдаз гьадани
Вич вуж ятIа, лагьана.

Мадни дерди тикрарна,
Фан тике гун тIалабна.
Гъалаб квачиз са кIусни,
Кесиб касди жавабна:

-ТIвар ятIани къайиди,
Валай вири рази я -
Ваз тафават авай туш,
Вуж лежбер, вуж къази я.

Девлетлудаз, кесибдиз
Жаза сад хьиз гузва на:
Вирибур са тегьерда
Ажалдин цIа кузва на.

-Суфрадик фу куматIа,
Килигин кван, яваш кван...
Фена кIваляй хтайла,
Кесибдив са лаваш гвай...

 

 

На первую страницу >>>


 

Цитата месяца: "Целые народы ненавидят уроды" М. Бабаханов

 

Сайт управляется системой uCoz