Мир - вашему дому, покой - вашей душе!
ФИТНЕ
(Кьиса)
Аслан, пачагь ничхиррин,
ТIазва лагьай ван хьана,
Виридаз чирхчирриз
Са кьил чIугваз кIан хьана.Пеленг, севни, лекьенни,-
ГьикI я?-жузаз акъатна.
Ам тIаз акур къуьренни
Вилелай нагъв аватна.Вири къвезвай, вирида
Гуьгьуьл къачуз, хъфизвай:
Чизвачир, вуч ийида –
Кьилеллайди рекьизвай.Татай гьайван амукьнач.
-Вуж ама кьван татайди?
СикIрехъ зи вил галукьнач,
Гьинва за вах лагьайди?-Аслан стха, вун сагъ хьуй,-
Жанавурди кушкушна,-
Чаз гъам я вун начагъ хьун,
Югъ-йиф инал алтIушна.СикIрез авач хабарни,
Сейра вичиз кефзава,
Тазвач тефей са барни –
Чун ви кьилихъ шехьзава.И дуьньядив чIугур кьван
Авунай на хатурар:
Гьадаз ганай йугур кьван
Таза гаврин ютурар.Гила гьинва къурумсах?
Хъел къурмишиз эгечIна.
-Аслан, ингье зун, ви вах,-
СикI валакай хкечIна.-Вун акваз кIанз вил галаз,
Къара жигер кана хьи,
Зи играми пачагь, ваз
Азиятар гана хьи…Ви кьейи вах пашмандиз
Дуьньядилай элкъвезвай,
Вун сагъардай дармандихъ
Дуьнья тирвал къекъвезвай.Туьтуьна шел акIана:
-Жагъанани?
-Жагъана:
Легьзени геж тавуна,
РикIи кIвалах ийизмаз,
Жанавурдин хамуна
Тур лагьанва, чимизмаз.Квез тир артух луькIуьнар,
Кар авуна рикIик квай.
Герек хьанач къекъуьнар –
Жанавурни вилик квай…
