Мир - вашему дому, покой - вашей душе!
ЭКУЬНАХЪ
Шаркь терефдиз яна яру агъургъан,
Са вахт фидач, цавар тирвал чкIида.
Рагъ экъечIда, цIай куькIвенвай кьуьгъуьр хьиз,
Адан нурар - цацар чиле акIида.Кат хъийида чиг няналди цаварал,
Вирин кьеряй хъиперин ван хуькведач .
Фикирда на, авай кьван экв акурла,
Мад садрани дуьнья мичIи хъижедач.Цуьквери мад кьилихъ лентер кутIунда,
НуькIвери мад мани чирда тарариз.
Къунши папа ван кутада куьчедик,
Йифиз калер гьахьна лугьуз харариз.Ахвар кIамай руш экъечIда булахдал,
Са гъилихъ - квар, муькуьдал вил тIушуниз.
Ухшар жеда, цен дуьз хъийиз алгъайла,
Ам тупIалдиз, кварни къуьнел – къашуниз.Рекьер тирвал къерехравай къавахри,
Юзаз – чухваз, цавук хъиткъитI кутада.
ЦIарцIар гуда рагъ акьур кьван дакIарри,
Гьарда са рагъ куькIвейди хьиз аквада.Къужах-къужах кIунчIар кьада сиренри,
Гуз кIанз, амма низ гудатIа, чин тийиз.
Зани абур къе мад садра атIудач –
ЦIипуд йис я зун гуьруьшриз фин тийиз.
