Мир - вашему дому, покой - вашей душе!


МИСКIАЛАР

Акъвазнава са чкадал
Йифиз-юкъуз.
Ва вич финни ийизва
Гьа са чIавуз.
(Сят)

Югъ атайла юрта аваз,
Йифиз кIвалах авачирбур.
Юкъуз чпихъ кIвачер галаз,
Йифиз кIвачер галачирбур.
(Чекмеяр)

Ам вуч я, ни лугьуда,
Алач вичел, къушарал хьиз, цIакулар,
Луварни квач - лув гуда,
ЧIехи жеда, галачтIани дувулар.
(Варз)

Вирибур я шерик адаз,
Са гафар я жувандини патанди.
Виридалай вилик адаз,
Гъил вугана, салам гуда мугьманди.
(РакIарин десте)

ЗатIни къведач арадал,
Лагьаналди: «Вач, алад!».
Фидач лазим чкадиз,
Вегьедалди кьамуз сад.
(Масмар)

Ишлемишда ам пулунин чкадал
Африкада къени сад-кьве уьлкведа.
Ам вуч затI я, це къвезва вич арадал,
Амма вичиз яд акурла кичIеда.
(Кьел)

ЦIуз вегьейтIа кудач, вацIу тухудач,
КIантIа хци тур илига - атIудач.
Ам вуч затI я, амалар гвай чинердин,
Вилиз акваз, гъилерив кьаз тежерди.
(Хъен)

Вуч я, гьардаз вич атана кIаниди,
Кас авачир, атайла, шад жериди.
(Кьуьзуьвал)

Акьалайла нуькIрен вил кьван гъвечIиди,
Ахъагъайла гьуьлерилай чIехиди.
(Нефс)

Вуч я, гагь бахт, гагь бахтсузвал гъидайди,
КIел тавуна лукьманвилер чидайди,
КIвачер квачиз акъваз тийиз фидайди.
(Вахт)

Сифте жизви, ахпа къати жедайди,
Нагагь кьезил шагьвар аваз хьайитIа.
Ризкьи, гьикьван гайитIани, недайди,
Рекьидайди гьасятда яд хъвайитIа.
(ЦIай)

ТIебиатдин къанунриз
Вуч я акси къведайди:
Гьикьван гзаф атIайтIа,
Гьакьван чIехи жедайди?
(Фур)

Ам вуч ятIа, низ чида,
Ярх хьана ваъ, игит хьиз,
КIвачинкьилел рекьида.
(Тар)

Ам вуч затI я, эвер тийиз къведайди,
Сив авачиз, инсандин рикI недайди.
(Гъам)

Туьквенрай вич жедач къачуз,
Битмишзавач багъбанди.
Ам вуч затI я, ичIи чIавуз
АцIайдалай заланди.
(Руфун)

Са тIимил вахт тахьай чIавуз,
Вич тIалабиз гьатда вири.
Амма ахпа атай чIавуз,
ЦIарар-цIарар катда вири.
(Марф)

Рекьер ава виринра,
Гагь вахчуз, гагь вегьедай.
Чпяй вири инсанар
КьецIи ийиз къекъведай.
(Гурар)

Дуньядавай виридал
Вичи партал алукIна,
Вич, Багъдаддин саил хьиз,
КьецIилаваз амукьна.
(Раб)

Пурар даим акъвазна са чкадал,
Терс балкIанди чукурзава агъадал.
(ВацIни муьгъ)

ФизватIани гьар камуна чеб таз-таз,
Уьскуьк жезвай затI аквазвач жував заз.
(Гелер)

Буржунал бурж къачуда,
Ада гатфар хьайила,
Гьар садай цIуд вахкуда,
Са тIимил вахт фейила.
(Чил)

Аждагьан туш - нефс я пичIи,
Югъ атай кьван ийиз чапхун.
Гьикьван гзаф неда вичи -
Гьакьван гзаф жеда яхун.
(Дергес)

Вилер ахъазвайла,
Таквадайди,
Вилер акьалайла,
Аквадайди.
(Ахвар)

Гатуз, рагъ къваз, чимидайла,
Къалин партал алаз жеда.
Ахпа хъуьтIуьз, мекьидайла,
КьецIилаваз, зурзаз жеда.
(Тарар)

ГъвечIи чIавуз вирибурун дуст я вич,
Кар ийидач гьич садазни басхасдин.
Амма душман жеда чIехи хьайила,
Зиянар гуз, вичикай гьар са касдин.
(ЦIай)

Къаб я, вичиз хъсан фикир гайитIа,
Хуьрекдайла ишлемишда инсанди.
Гьикьван виче гзаф тIвеквер хьайитIа,
Гьисабзава гьакьван яз вич хъсанди.
(Саф)

Нагагь икI-акI хьайитIа,
ЗатI я гьар са дараматда ярамиш.
Гьикьван фад вич кьейитIа,
Гьакьван жеда яргъалди вич яшамиш.
(Шем)

Дамахар гвай Ханбиче,
Вич кIвалева – кIвал виче.
(Килигдай гуьзгуь)

Са затIуна хьайитIа
Чун гзаф гьикьван,
Кьезил жеда, залан ваъ,
А затI вич гьакьван.
(ТIвеквенар)

 

 

На главную страницу >>>

 

 

Цитата месяца: "Целые народы ненавидят уроды" М. Бабаханов